Pơhiăp ƀơi mông jơnum hơdor glăi, Khua mir sir ơi Lương Cường lăi pơtong, abih 80 thun laih rơgao akŏ pơdong, pơđĭ kyar, gah yŭ tơlơi git gai mơ̆ng Ping gah, khul grup nai thâo kơđi Việt Nam hơmâo ngă hrŏm hăng djuai ania laih anun pơgôp prong biă mă amăng bruă mă blah glăi ayăt rơnuk Prang, rơnuk Mi sua lŏn ia, hăng djru hrŏm pơklaih rơngai djuai ania, pơlir hơbit lŏn ia jing sa, ăt kah hăng rơnuk man pơdong hăng wai pơgang dêh čar ră anai.

Khua mir sir ơi Lương Cường đăo kơnang, hăng tơlơi thâo gum pơgôp, pơčeh phrâo hăng gơgrong ba amăng bruă mă, khul grup nai thâo kơđi Việt Nam ăt amra djă kơjăp gru grua hing ang 80 thun rơgao; ƀu pơdơi ôh kơtưn na nao amăng bruă hrăm ƀư̆ pơkra pran jua, pơđĭ tui tơlơi thâo bruă mă, pran jua kơđi čar, ai hơtai amăng bruă mă tơpă, thâo hruaih, khin hơtai ngă djơ̆ tơlơi phiăn, kiăng dưi ngă giong bruă jao yom pơphăn; pơgang tơlơi tơpă djơ̆ găl, pơgang tơlơi phiăn dêh čar, pơgang tơlơi dưi ană mơnuih, tơlơi dưi djơ̆ găl  mơ̆ng mơnuih ƀôn sang, kơnuk kơna hăng khul mơnuih mơnam, djru hrŏm sit nik amăng bruă man pơdong, pơđĭ kyar lŏn ia amăng rơnuk hrưn đĭ pô.