Nao čuă, pơpŭ thun phrâo Khua mir sir hơđăp ơi Nguyễn Minh Triết hăng Khua mir sir hơđăp ơi Trương Tấn Sang ƀơi ƀing sang gơñu pô. Khua mir sir pơdah pran pơpŭ, hơdor tơngia hơdôm tơlơi gum pơgôp prong prin mơng Khua mir sir hơđăp ơi Nguyễn Minh Triết hăng Khua mir sir ơi Trương Tấn Sang brơi kơ bruă ngă hơkrŭ mơng Ping gah, mơng djuai ania; laih dong čang tơmang tŏ tui tŭ mă tơlơi pơgôp hiăp, tơlơi găn rơgao yôm phăn mơng ƀing khua mua hơđăp brơi kơ bruă pơjing hăng pơđĭ kyar lŏn ia amăng rơnuk phrâo.

Amăng hrơi mông pơđao pran jua, bă blai pran khăp pap, Khua mir sir tơña bla tơlơi hơdip, bruă hrăm hră, bruă mă mơng ƀing mơnuih amăng sang anŏ Khua git gai Ping gah hơđăp rơgŏm ơi Lê Duẩn, Khua git gai Ping gah hơđăp ơi Nguyễn Văn Linh, Khua khul pơ ala Kơnuk kơna hơđăp ơi Võ Chí Công, Khua mir sir hơđăp ơi Lê Đức Anh; pơpŭ hơ-ơč sang anŏ ƀing khua mua suaih pral, yâo mơ-ak, ngă bruă truh kih, tŏ tui gru grua sang anŏ hăng hơdôm tơlơi dưi hơmâo ngă, ƀu pơdơi gir run hrăm hră, ngă bruă klă, djru brơi lu ƀiă dong kơ lŏn ia, mơnuih ƀôn sang.