Amăng tal nao čuă jơmư sit nik dêh čar Chile, ƀơi plơi prong jưh jom Santiago de Chile, Khua mir sir ơi Lương Cường hăng grup khua mua pơprong mơ̆ng Việt Nam hơmâo nao čuă, pơhiăp hrŏm hăng khua mua, mơnuih apăn bruă amăng sang bruă khua anih jưh pơ ala hăng mơnuih ƀôn sang Việt Nam dŏ ƀơi dêh čar Chile. Ƀơi mông bưp nao rai, Khua anih jưh pơ ala Việt Nam ƀơi Chile lăi pơthâo hăng khua mir sir ơi Lương Cường kơ tơlơi pơhing bruă mă mơ̆ng Sang bruă khua anih jưh pơ ala hăng mơnuih ƀôn sang Việt Nam dŏ hơdip mơda, mă bruă ƀơi Chile.

Khua anih jưh pơ ala lăi pơtong, tui hăng atur bruă ngă pŭ ƀăn gru grua mơ̆ng đưm, dưi pơbŭ tui mơ̆ng lu gưl rơnuk khua mua hăng mơnuih ƀôn sang dua bơnah, bruă mă phun, hlom bom mơ̆ng anom bruă khua anih jưh pơ ala Việt Nam ƀơi Chile lĕ djă hơnơ̆ng bong kơjăp bruă ngă hrŏm kơđi čar hiam klă kơ dua bơnah. Khua mua, mơnuih apăn bruă amăng sang bruă khua anih jưh pơ ala hăng mơnuih ƀôn sang Việt Nam dŏ ƀơi Chile đăo kơnang tong ten jơlan hơdră, tơlơi phiăn mơ̆ng ping gah, kơnuk kơna, ăt kah hăng kơnuih hiam klă mơ̆ng lŏn ia ta hmư̆ tui amăng jar kmar laih anun đăo kơnang tong ten Việt Nam hrưn đĭ amăng rơnuk phrâo mơ̆ng djuai ania. Amăng tal nao čuă jơmư dêh čar Chile anai mơ̆n, Khua mir sir ơi Lương Cường hơmâo tŭ jum khua ping gah Cộng sản Chile, Lautaro Carmona Soto; tŭ jum laih anun ră ruai mơak hăng khua mua Anom kơsem min gru grua hiam Chile-Việt Nam.