Đĭ pơhiăp amăng hrơi jơnum ngui, Khua mir sir ơi Lương Cường lăi nao rơđah kơ pran kơtang mơng tơlơi gum pơgôp, gơgrong mơng abih bang mơnuih ƀôn sang, khul ling tơhan tui tơlơi git gai mơng Ping gah, hơmâo găn rơgao lu tơlơi tơnap tap, tơlơi lông, dưi blah pơkiăo đuăi ayăt, pơlir lŏn ia ta, hăng hơmâo lu tơlơi dưi pơprong, yôm phăn amăng 40 thun pơplih phrâo, kiăng lŏn ia ta hơmâo tơlơi dưi prong hăng tơlơi đăo gơnang amăng jar kmar tui ră anai.

Hăng gru grua sông kơtang, thâo khăp pap, thâo gum pơgôp hơmâo pơjing, djă pioh amăng djop rơnuk mơnuih ƀôn sang amăng plơi Bảo An hăng 16 boh plơi pla amăng să Gò Nổi, hrŏm hăng tơlơi gir run mơng gưl Ping gah, gong gai, jơnum min djop djuai ania mơnuih mơnam, Khua mir sir đăo gơnang djop plơi pla amăng să Gò Nổi amra tŏ tui pơđĭ kyar kơtang, jing anih bơngač amăng man pơdong plơi pla phrâo tui kru hle, plơi pla hiam klă, rơnuk rơnua, yâo mơ-ak.