Mơguah lơ 22/9 (tui mông Việt Nam), Khua mir sir ơi Lương Cường hăng Bơnai ñu hrŏm hăng ƀing khua prong mơ̆ng Việt Nam nao truh laih pơ New York, dêh čar Mi, pơhmư̆ mông Jơnum pơčrông sai hrŏm Khul khua Sang gum hơbit djŏp dêh čar tal 80. Anai jing tal nao mă bruă blung a mơ̆ng Khua mir sir ƀơi mông jơnum đơ đam rŏng lŏn tơnah prong hloh, laih dong kơđŏm gru 2 thun akŏ pơjing tơlơi rô nao rai ngă hrŏm yôm amăng abih bang bruă kơplah wah Việt Nam hăng Mi.

Giăm 50 thun rơgao, tơlơi rô nao rai Việt Nam - Sang gum hơbit djŏp dêh čar hơmâo đĭ kyar klă, tŭ yua, jai hrơi dlăm tui. Tal nao mă bruă mơ̆ng Khua mir sir dêh čar pơdah jơlan hơdră pơtom hiăp rơngai, gơgrong mă pô, ngă hrŏm hăng lu dêh čar, lu bruă mă, mut hrŏm jar kmar amăng djŏp bruă. Khua mir sir him lăng či nao pơhmư̆ mông ngă lơphet 80 thun akŏ pơdong Sang gum hơbit djŏp dêh čar, pơhiăp ƀơi mông Jơnum bơkơtuai hrŏm hăng Jơnum khua mua prong kơ Bruă pơgang ayuh hyiăng, laih dong hơmâo mông bưp nao rai dua bơnah hăng khua mua hơdôm khul grup anom bruă jar kmar wơ̆t hăng lu dêh čar.