Tŭ jum Khua anih jưh pơ ala dêh čar Kur, yă Touch Pharat, Khua mir sir ơi Lương Cường pơpŭ Khua anih jưh hơmâo jao mă bruă ƀơi Việt Nam, đăo gơnang hăng tơlơi thâo thăi bruă pơtom hiăp, Khua anih jưh amra hơmâo lu tơlơi pơgôp prong, pơgôp pơtrut tơlơi rô nao rai dua bơnah dêh čar ha guai hiam klă, giang mah gru grua, ngă hrŏm djop mơta, hơđong kjăp sui pơ anăp kơplah wah dua boh dêh čar. Khua mir sir pơsit tong tơlơi yôm kơđi čar dơlăm, pơdah hơdră ngă bruă kjăp mơng Việt Nam lêng kơ đing nao bruă pơđĭ kyar tơlơi rô nao rai giang mah gru grua Việt Nam-Kur kah hăng tlâo boh dêh čar Việt Nam-Kur-Lao lêng kơ gum pơgôp amra găn rơgao djop tơlơi tơnap tap.

Pơpŭ kơ ơi Thammer Mohammed Al Gosaibi hơmâo ruah ngă khua anih jưh pơ ala dêh čar Saudi Arabia ƀơi Việt Nam, Khua mir sir pơsit tong Việt Nam lăng yôm tơlơi glăm ba hăng kơdrưh ang mơng Saudi Arabia amăng kual, sit biă ñu amăng kual Arab hăng đăo Islam; pơpŭ hơdôm tơlơi dưi prong amăng pơđĭ kyar lŏn ia mơng Saudi Arabia amăng bruă ngă tui hơdôm hơnong pơkă tui jơlan gah yak nao truh thun 2030 hăng đăo gơnang Sang ơi pơtao, Kơnuk kơna hăng mơnuih ƀôn sang Saudi Arabia amra tŏ tui hơmâo lu tơlơi dưi ƀiă dong amăng bruă pơjing hăng pơđĭ kyar lŏn ia.