VOV4.Jarai-Ăt amăng tal nao mă bruă ƀơi Tokyo, lơ 26/9, Khua mir sir ơi Nguyễn Xuân Phúc hơmâo bưp Khua pơ ala mơnuih ƀôn sang gah gơnong dlông dêh čar Japan, Otsuji Hidehisa.

Khua mir sir ơi Nguyễn Xuân Phúc bưp Khua git gai pơ ala mơnuih ƀôn sang gơnong

dlông dêh čar Japan

Khua mir sir ơi Nguyễn Xuân Phúc pơdah pran jua hning rơngôt hrom mơ̆ng Khua mua ping gah, Kơnuk kơna, anom bruă pơ ala mơnuih ƀôn sang hăng mơnuih ƀôn sang Việt Nam pioh kơ mơnuih ƀôn sang, anom bruă pơ ala mơnuih ƀôn sang dêh čar Japan, ƀơi anăp kơ tơlơi rơngôt Khua hơđăp dêh čar Japan, ơi Shinzo Abe rơngiă; lăng yôm tơlơi ngă pŭ ƀăn gơyut gơyâo dua bơnah pơđĭ kyar phrâo anai. Khua mir sir ơi Nguyễn Xuân Phúc lăi lĕ, thun blan rơgao, tơlơi ngă giăng mah mơak klă, jĕ giăm, rô nao rai dua bơnah khua mua pơ ala mơnuih ƀôn sang dêh čar kjăp tong ten hăng tŭ yua.

Tui hăng anun, Khua mir sir čang rơmang dua bơnah kơtưn hloh bruă ngă hrom, boh nik ñu ƀrô hơdor glăi tal 50 thun hrơi ngă giăng mah dua bơnah či pơphun amăng thun 2023.

Nay Jek: Pơblang