Ƀơi mông tŭ jum, Khua mir sir ơi Nguyễn Xuân Phúc lăi pơtong, Việt Nam lăng yôm biă mă pơtrut bruă ngă giăng mah yôm phara hăng Australia, sa bơnah ngă hrom pơđĭ kyar yôm mơ̆ng Việt Nam ƀơi kual ia rơsĭ Dơnung Thái Bình Dương, ăt jing bơnah ngă hrom hlom bom mơ̆ng ASEAN.

Khua mir sir lăng yôm bruă lu kual ala čar dêh čar Australia đing nao pơtrut bruă ngă giăng mah hăng Việt Nam; lu tơring čar dua bơnah dêh čar gir run hơduah ĕp anŏ gêh găl ngă hrom; amăng anun hơmâo kual ala čar South Australia ngă hrom tơring čar Nghệ An, ƀôn prong Đà Nẵng gah bruă pơtô hrăm. Khua mir sir ăt rơkâo kơ kual ala čar South Australia pok pơhư prong ngă hrom lu tơring čar pơkŏn amăng Việt Nam; laih dơ̆ng sem lăng pok anom bruă pơ ala sĭ mơdrô-tuh pơ alin ƀơi Việt Nam.