Ƀơi mông tŭ jum, Khua mir sir ơi Nguyễn Xuân Phúc lăi pơtong, Việt Nam gir run na nao djru dêh čar Lao găn rơgao hĭ tơlơi tơnap tap kiăng ƀrư̆ ngă hơđong, rŭ glăi bơwih ƀong huă mơnuih mơnam. Lăi pơtong, thun 2022, yôm biă mă hăng lu gru tơhnal djă pioh gru phun jĕ giăm rô nao rai dua boh dêh čar, yă Sisay Leudetmounsone brơi thâo, dua bơnah ngă hrom pơphun lu bruă mă sit nik, tŭ yua, djru ngă kjăp hăng kơtưn tui tơlơi rô nao rai tong ten, tơpă, gum pơgôp phara plah wah dua ping gah, dua boh lŏn ia hăng mơnuih ƀôn sang dua boh dêh čar.

Yă Sisay Leudetmounsone lăi amra hrom hăng djop rơnuk, gưl khua mua dêh čar Lao ăt kah hăng ƀing hlăk ai Lao djă pioh na nao hăng pơbŭ tui tơlơi ngă giăng mah yôm phara mơ̆ng đưm đă hiam klă plah wah dua bơnah ping gah, dêh čar.