Mơguah tom brơi, lơ 25/7, Khua mir sir ơi Tô Lâm hơmâo tŭ jum Khua ping gah mơnuih ƀôn sang dêh čar Kur CPP, Khua anom bruă pơ ala mơnuih ƀôn sang gơnong dlông dêh čar Kur, ơi Hun Sen, Khua dêh čar Hàn Quốc, ơi Han Duck Soo, Khua ding jum tơhan hơđăp hăng Mơnuih ngă hơkrŭ dêh čar Algeria, Laid Rebiga, khua djru bruă pơgang rơnuk rơnua dêh čar India, ơi Ajit Doval. Ƀơi mông tŭ jum, Khua mua pơ ala djop dêh čar tač rơngiao pơdah pran jua juh alum hrŏm hăng tơlơi đuăi nao mơ̆ng Khua git gai ping gah ơi Nguyễn Phú Trọng, mơ-it hiăp tơña bla laih anun hning rơngôt hrŏm hăng khua mir sir ơi Tô Lâm, khua mua ping gah, kơnuk kơna hăng mơnuih ƀôn sang Việt Nam.

Khua mua lu dêh čar tač rơngiao dong yua hăng pơpŭ biă mă hơdôm tơlơi pơgôp hrŏm prong prin mơ̆ng ơi Nguyễn Phú Trọng Khua git gai ping gah dêh čar ta, amăng bruă mă pơđĭ kyar tui ngă giăng mah pŭ ƀăn plah wah Việt Nam hăng djop dêh čar; đăo kơnang kơ ơi Tô Lâm Khua mir sir hăng khua mua git gai amăng lŏn ia Việt Nam ba dêh čar Việt Nam ăt pơđĭ kyar tui hloh, tŏ tui hơdôm kông ngăn yôm mơ̆ Khua git gai ping gah ơi Nguyễn Phú Trọng pioh glăi.

Khua mir sir ơi Tô Lâm mơ-it hiăp bơni yôm hăng kơnuk kơna, lŏn ia, khua mua pơ ala mơnuih ƀôn sang dêh čar tač rơngiao, mơnuih ƀôn sang hăng khua mua djop dêh čar pioh tơlơi khăp yôm phara hăng Khua git gai ping gah ơi Nguyễn Phú Trọng, ăt lăng kah hăng dŏ giăm djru ba hơbit hăng khua mua laih anun mơnuih ƀôn sang Việt Nam amăng hrơi mông hning rơngôt, kiăng pơdah rai tơlơi khăp jĕ giăm lir hơbit gơyut gơyâo plah wah Việt Nam hăng hơdôm dêh čar.