Ƀơi mông bưp, Khua mir sir ơi Võ Văn Thưởng lăi, Việt Nam lăng yôm bruă rô nao rai Việt-Lao jing kông ngăn yôm pơphăn, tơlơi jĕ giăm tơpă hiam, tong ten, rơđah rơđong hin biă mă amăng jar kmar. Dua čô khua tŭ ư ăt djă pioh na nao boh tơhnal tơlơi phiăn jĕ giăm, rô nao rai gru grua, pơrơguăt drơi jăn hăng tuai čuă ngui; ngă klă Kơčăo bruă pơđĭ tui boh tŭ yua hăng anŏ hiam klă ngă hrŏm Việt Nam-Lao amăng bruă pơtô pơjuăt hăng pơđĭ kyar pơtô mơnuih apăn bruă mơ̆ng thun 2021-2030.

Khua git gai ping gah-khua mir sir dêh čar Lao, ơi Thongloun Sisoulith brơi thâo, dêh čar Lao lăng yôm biă mă hăng ngă hrŏm hlom bom hăng Việt Nam, gir run pơbŭ tui na nao hăng ba tơlơi giăng mah pŭ ƀăn đĭ prong, gum pơgôp tong ten laih anun ngă hrŏm hlom bom, kjăp hơđong, jai hrơi dơlăm hloh; lăi pơtong amra hur har pơtrut tơlơi ngă giăng mah dua bơnah ping gah, dua bơnah dêh čar. Ăt amăng tal nao jơnum anai mơ̆n, Khua mir sir ơi Võ Văn Thưởng hăng grup khua mua mơ̆ng Việt Nam hơmâo bưp ƀing khua mua, mơnuih mă bruă amăng sang bruă pơ ala dêh čar Việt Nam ƀơi dêh čar Khač.