Amăng mông bưp, dua čô khua pơdah tơlơi hok mơ-ak kơ hơdôm boh than dưi ngă yôm phăn amăng ngă hrŏm thun blan laih rơgao anun lĕ tŏ tui pơbưp nao rai khua mua pơprong hăng djop gưl, pơtrut kơtang djop mơta bruă ngă hrŏm amăng bơwih ƀong huă-sĭ mơdrô, pơgang rơnuk rơnua, boh thâo măi mok, pơtô pơjuăt, apui lơtrik, pơbưp nao rai mơnuih ƀon sang. Khua mir sir ơi Võ Văn Thưởng lăng yôm hăng pơpŭ bơni Khua mir sir ơi Putin, gong gai ƀon lan ƀơi Nga hơmâo djru man pơdong gong kut Khua mir sir Hồ Chí Minh ƀơi Saint Petersburg.

Khua mir sir čang rơmang Nga tŏ tui djru hrăm hră brơi ƀing čơđai sang hră Việt Nam nao hrăm pơ dêh čar Nga kah hăng kơtưn ngui pơlăi nao gru grua, pơbưp mơnuih ƀon sang. Khua mir sir ơi Vladimir Putin pơsit tong Việt Nam lĕ sa amăng hơdôm boh dêh čar ngă gŏp yôm hloh mơng Nga ƀơi kual Asia-Thái Bình Dương, tŏ ngă tui hơdôm hơdră ngă hrŏm amăng sĭ mơdrô, tuh pơ alin dua bơnah hăng djop bơnah, kơtưn ngă hrŏm kơplah wah djop ding jum, gơnong bruă, gong gai ƀon lan mơng dua bơnah.