Ƀơi kual Dap Kơdư, giăm 1 klăk 400 rơbâo čô čơđai sang hră djop gưl ăt kơdok kơdor nao hrăm hră thun phrâo. Amăng anun, tơring čar Dak Lak hơmâo 500 rơbâo čô čơđai sang hră, Gia Lai hơmâo 368 rơbâo čô čơđai sang hră, Lâm Đồng hơmâo 334 rơbâo čô čơđai sang hră, Dak Nông hơmâo 185 rơbâo čô čơđai sang hră hăng Kon Tum lĕ hơmâo 166 rơbâo čô čơđai sang hră. Biă mă ñu, ƀing nai hăng čơđai sang hră đôm lăm kơnuk kơna rông ba ƀơi Gia Lai hok mơak dưi čơkă Khua mir sir ơi Võ Văn Thưởng nao jơnum hrŏm mut thun hrăm phrâo. Khua mir sir lăi pơtong, Dơ̆ng mơ̆ng sang hră khăp ƀu-eng anai, hơdôm rơbâo čô čơđai sang hră djuai ania Bahnar, Jrai, Thái, Nùng, Tày, Êđê, Sedang....dưi hrăm truh kih tŭ yua, djru pran jua kơ bruă čar, akŏ pơdong hăng pơđĭ kyar bơwih ƀong huă mơnuih mơnam, pơgang rơnuk rơnua lŏn ia hăng tơring čar. Amăng mrô anun, hơmâo lu čơđai sang hră dưi ngă khua pơprong ƀơi tơring čar.

Ƀrô djơ̆ tal anai, Khua ding jum Pơtô hăng Pơjuăt ơi Nguyễn Kim Sơn hơmâo mông mă bruă hăng Gơnong bruă Pơtô hăng Pơjuăt tơring čar Gia Lai. Pơ anai, ơi Nguyễn Kim Sơn rơkâo anom bruă pơtô hrăm tơring čar Gia Lai khom pơblih phrâo hơdră pơtô hrăm, gleng nao, ngă gêh găl kơ ƀing nai pơtô amăng tơring čar dưi hơđong pran jua mă bruă, pơtô hrăm djơ̆ hơdră pơtô hrăm phrâo gưl phun dêh čar.

Mơguah lơ 5/9, ơi Nguyễn Trọng Nghĩa, Khua anom pơtô bruă Ping gah dêh čar hơmâo jơnum hrŏm hrơi mă yua ring bruă ia hơdjă ƀơi bul ia Tân Phú Đông, tơring čar Tiền Giang. Ơi Nguyễn Trọng Nghĩa pơtă kơ ƀing khua, nai pơtô hăng čơđai sang hră tơring čar Tiền Giang lăi hrŏm hăng sang hră gưl 2 Tân Phú lăi hơjăn ngă kơjăp tui bruă pơtô hăng hrăm, djru bruă pơtô ba ană mơnuih, pơtô ba mơnuih rơgơi djru kơ lŏn ia.

Djŏp gưl ping gah, gong gai plơi pla kiăng hơdor na nao tơlơi pơmin, jơlan pơtô pơjuăt mơ̆ng Ping gah - Kơnuk kơna, laih anun tơlơi pơtô mơ̆ng Wa Hồ khăp ƀu-eng, lăng ba, djru brơi klă hloh kơ bruă pơtô pơjuăt; kiăng pơtô boh hră wơ̆t hăng pơtô tơlơi pơmin hiam, pơtô kiăng khăp kơ lŏn ia.