Tŭ ư tơlơi jak iâu mơ̆ng Khua git gai Ping gah dêh čar Khač, Khua mir sir dêh čar Khač ơi Tập Cận Bình, mơguah anai lơ 17/10, Khua mir sir ơi Võ Văn Thưởng ba jơlan grup khua mua prong mơ̆ng Việt Nam nao pơ Bắc Kinh, pơhmư̆ mông Jơnum khua mua prong ngă hrŏm jar kmar “Jơlan ter hăng glông jơlan” tal 3 mơ̆ng lơ 17 truh lơ 20/10. Anai jing tal nao mă bruă blung a mơ̆ng Khua mir sir ơi Võ Văn Thưởng pơ dêh čar Khač tơdơi kơ Việt Nam pơphun truh kih Jơnum ruah khua Ping gah dêh čar tal 13 laih anun dêh čar Khač pơphun truh kih Jơnum ruah khua ping gah dêh čar tal 20.

Thun 2023 ăt jing thun ngă lơphet 15 thun rô nao rai ngă hrŏm yôm abih bang kơplah wah Việt Nam hăng Khač laih anun ngă lơphet 10 thun akŏ pơdong hăng pơđĭ kyar tơlơi pơčeh Jơlan ter hăng glông jơlan. Tal nao mă bruă mơ̆ng ơi Võ Văn Thưởng jing yôm biă mă, pơdah pran jua pơpŭ mơ̆ng Ping gah, Kơnuk kơna ta amăng bruă pơđĭ kyar tơlơi rô nao rai hăng dêh čar Khač.