Amăng mông bưp Khua grup Huawei Lương Hoa, Khua mir sir ơi Võ Văn Thưởng lăi pơtong, bruă pơplih yua boh thâo phrâo hăng pơđĭ kyar bơwih ƀong mă yua boh thâo phrâo amăng rŏng lŏn tơnah glăk pơđĭ kyar tañ biă mă. Việt Nam lăng yôm hăng đing nao pơplih mă yua boh thâo phrâo, pơjing tơlơi bơwih ƀong huă mă hăng mơnuih mơnam mă yua boh thâo phrâo. Việt Nam iâu pơthưr tơlơi gum hrŏm mơng djop bơnah, mơng djop gưl Kơnuk kơna truh ƀing mơnuih gum djru, ngă hrŏm, tuh pơ alin amăng man pơdong anih anom, pơgiong hơdră pơtrut pơđĭ kyar bơwih ƀong mă yua boh thâo phrâo.

Tŭ jum ơi Lý Tự Học - Khua git gai grup bơwih ƀong Trung Hưng (ZTE), Khua mir sir ơi Võ Văn Thưởng lăng yôm hơdôm boh than dưi ngă amăng bơwih ƀong sĭ mơdrô mơng ZTE hăng boh than ngă hrŏm amăng bơwih ƀong sĭ mơdrô mơng ZTE ƀơi Việt Nam, anai lĕ ƀing blơi mut, anom bruă ngă hrŏm hăng lu anom bruă dăng kông mơng Việt Nam. Khua mir sir lăng yôm bruă hơdôm anom bruă tuh pơ alin Khač hơmâo pok pơhai rơbêh 4 rơbâo akŏ bruă glăk dŏ mă bruă ƀơi Việt Nam hăng abih tih rơbêh 26 klai đôlar Mi. Amăng anun, ZTE hơmâo nao bơwih ƀong ƀơi Việt Nam sui thun laih. Khua mir sir đăo gơnang, ZTE amra ngă hrŏm kjăp, tŭ yua ƀiă dong hăng hơdôm anom bơwih ƀong sĭ mơdrô ƀơi Việt Nam pơgi kơdih anai; pơgôp nao amăng bruă pơđĭ kyar hrŏm amăng tơlơi rô nao rai ngă hrŏm Việt Nam-Khač.