Khua mir sir dêh čar ta ơi Lương Cường hăng bơnai ñu hrŏm hăng hăng khua mua pơprong mơng Việt Nam pơđut hĭ hiam klă tal nao mă bruă kiăng mut hrŏm hơdôm jơnum khua mua pơprong Khul pơ ala Sang gum hơbit djop dêh čar tal 80, pơlir hăng bruă dua bơnah ƀơi dêh čar Mi, dong mơng lơ 21 truh lơ 24/9. Amăng hơdôm hrơi nao mă bruă, Khua mir sir hơmâo hơdôm tơlơi pơhiăp yôm phăn amăng jơnum pơčrông sai hrŏm khua mua pơprong mơng Khul pơ ala Sang gum hơbit djop dêh čar tal 80 hăng jơnum khua mua pơprong rŏng lŏn tơnah yôm phăn kơ bruă wai pơgang ayuh hyiăng. Laih dong, Khua mir sir hơmâo hơdôm mông pơbưp nao rai dua bơnạ hăng khua mua hơdôm khul grup jar kmar hăng khua mua hơdôm boh dêh čar.

Khua mir sir pơsit tong Việt Nam lêng kơ gir run abih pran jua hăng gum hrŏm djop dêh čar kiăng glăm ba hơdôm bruă hrŏm, găn rơgao tơlơi lông, pơtrut pơplih kơtang kiăng pơjing rŏng lŏn tơnah rơnuk rơnua, hơđong, pơđĭ kyar pơdrong sah hăng hơđong kjăp, ba glăi tơlơi yâo mơ-ak, trơi pơđao brơi abih bang mơnuih. Tal hyu mă bruă mơng Khua mir sir hơmâo pơđut hĭ hiam klă amăng djop mơta djop bơnah hăng dua bơnah, kơđŏ glăi tơlơi hiam kơ pran gơgrong, kơdrưh ang, tơlơi gum pơgôp prong, sit nik mơng Việt Nam amăng pơsir hĭ hơdôm bruă amăng rŏng lŏn tơnah kah hăng pơtrut tơlơi rô nao rai Việt Nam hăng Mi, tơlơi rô nao rai hăng hơdôm boh dêh čar kiăng pơgôp pơgang rơnuk rơnua, pơđĭ kyar amăng kual hăng rŏng lŏn tơnah.