Khua mir sir ơi Võ Văn Thưởng lăi pơtong, mơnuih ƀon sang dua boh dêh čar Việt Nam-Cuba lêng gum pơgôp, djru nao rai amăng djop rơnuk ngă hơkrŭ; đing nao, pơtrut pơsur găn rơgao tơnap tap. Khua mir sir pơsit tong: Ping gah, Kơnuk kơna, mơnuih ƀon sang Việt Nam hok mơ-ak yua hơmâo pran gum pơgôp yôm phă hăng ngă hrŏm kơplah wah Việt Nam-Cuba jai pơđĭ kyar sit nik amăng djop mơta bruă.

Khua mir sir ơi Võ Văn Thưởng rơkâo, hrŏm hăng bruă kơtưn ƀiă dong mông jơnum khua mua pơprong, dua bơnah kiăng pơtrut kơtang bruă pơbưp nao rai, ngă hrŏm kơplah wah Ding jum ling tơhan Việt Nam hăng Ding jum hơdôm khul ling tơhan ngă hơkrŭ Cuba. Amăng hrơi blan rŏng lŏn tơnah ƀuh lu tơlơi rung răng, tơlơi rô nao rai ngă hrŏm gah ling tơhan kơplah wah dua bơnah yôm phăn biă mă. Ping gah, Kơnuk kơna Việt Nam lêng ngă gêh gal kiăng Ding jum ling tơhan gum djru, ngă hrŏm hăng Ding jum hơdôm khul ling tơhan ngă hơkrŭ Cuaba amăng hơdôm bruă dua bơnah dưi ngă hăng kiăng ngă hrŏm.