Ƀơi mông jơnum bơkơtuai nao rai, dua bơnah pơpŭ nao rai tơdruă hơdôm boh tơhnal dưi ngă mơ̆ng rim ping gah, dêh čar tŭ mă lơ̆m bruă mă akŏ pơdong lŏn ia anăp nao mơnuih mơnam bơkơnar, ngă khua pô, ba glăi tơlơi hơdip mơda trơi pơđao yâo mơak kơ mơnuih ƀôn sang. Khua mir sir Võ Văn Thưởng lăi pơtong, pơđĭ kyar bruă ngă giăng mah hăng dêh čar Khač jing sa tơlơi ruah mă, đing nao hlâo hloh amăng jơlan hơdră pơtom hiăp mơ̆ng Việt Nam.

Khua git gai ping gah, Khua mir sir dêh čar Khač, Tập Cận Bình lăi pơtong, dêh čar Khač ăt lăng kơ Việt Nam sa boh dêh čar hơmâo anih dŏ yôm biă mă, kiăng kơtưn hơduah ĕp thâo hluh nao rai tơdruă, đăo kơnang mơ̆ng mơnuih ƀôn sang, dua čô khua ăt rơkâo brơi kơtưn pơphun bưp nao rai, bơkơtuai khua mua, mơnuih ƀôn sang, djop hnơr rơnuk hlăk ai, čơđai muai kiăng pơtô brơi bruă ngă giăng mah pŭ ƀăn hiam klă dua bơnah hơmâo mơ̆ng đưm đă. Hrơi anun mơ̆n, Khua dêh čar Phạm Minh Chính, Khua pơ ala mơnuih ƀôn sang dêh čar Vương Đình Huệ ăt hơmâo bưp ră ruai tom hăng khua git gai ping gah, khua mir sir dêh čar  Khač, Tập Cận Bình.