Pơhiăp ƀơi mông bưp, Khua khul đăo Khŏp Giuse Nguyễn Chí Linh, Khua wai lăng khul đăo Khŏp Huế pơpŭ bơni hăng hok mơ-ak biă lơ̆m hơmâo čơkă Khua mir sir hăng grup khua mua rai čuă Khul đăo Khŏp plơi prong Huế, bơni hơ-ơč hrơi Noel kơ neh met wa tui đăo Khŏp ƀơi Huế.

Khua khul đăo Khŏp Giuse Nguyễn Chí Linh lăng yôm tơlơi truh kih mơ̆ng hơdôm tal nao pơ dêh čar tač rơngiao mơ̆ng Khua mir sir Võ Văn Thưởng amăng thun 2023; pơ ala kơ Kơnuk kơna Việt Nam hyu bưp, mă bruă tom ƀing khua mơ̆ng lu dêh čar pơprong; djru pơđĭ tui kơdrưh kơ-ang mơ̆ng Việt Nam.

“Hăng mơnuih tui đăo Khŏp Việt Nam, tal nao čuă Vatican hăng bưp Ama prong Francis mơ̆ng Khua mir sir Võ Văn Thưởng jing tơlơi klă hiam, amra tŭ yua pơ anăp. Biă ñu, mơnuih ƀôn sang tui đăo Khŏp ƀơi Huế, yua tal hyu čuă anai mơn jai mơ-ak hloh dong lơ̆m gơñu pơmin ƀu sui dong tah amra hơmâo čơkă Ama prong Francis ƀơi Linh địa La Vang. Hăng pô kâo, rơngiao kơ tơlơi hok mơ-ak phrâo lăi nao, kâo lăng djơ̆ pran biă hăng tơlơi rô nao rai khul grup apăn bruă hăng mơnuih ƀôn sang tui đăo Khŏo jai hrơi mơ-ak tui, jai hrơi jê̆ giăm tui, jai hrơi rơnôm tui”.

Hok mơ-ak lơ̆m nao čuă Sang jơnum khul đăo Khŏp Huế amăng hrơi giăm truh Noel, Khua mir sir Võ Văn Thưởng bơni hơ-ơč tơlơi klă hiam mơ̆ng Khua mua ping gah, Kơnuk kơna kơ Khua wai lăng khul đăo Khŏp Giuse Nguyễn Chí Linh, Khua Khul đăo Khŏp Huế; ƀing ama, ƀing amai, hăng neh met wa tui đăo khŏp ƀơi Huế čơkă bơyan Noel yâo mơ-ak; sa thun phrâo rơnuk rơnua.

Lăi pơthâo bruă hơmâo mơ̆ng lŏn ia ta, Khua mir sir brơi thâo, thun 2023 lŏn ia hơmâo lu tơlơi truh kih hơmâo jar kmar lăng yôm, amăng anun hơmâo tơlơi gum djru mơ̆ng mơnuih tui đăo khŏp amăng dêh čar ta. Hăng tơlơi pơmin “Hơdip klă hiam amăng djuai ania či bơwih brơi tơlơi yâo mơ-ak mơ̆ng mơnuih mơnam”, mơnuih tui đăo Khŏp gir gum hrŏm bơkơtưn khăp kơ lŏn ia yua Jơnum min djŏp djuai ania mơnuih mơnam Việt Nam hăng hơdôm khul grup pơphun; biăñu lĕ bruă djru ba tơlơi hơdip mơnuih ƀôn sang, djru khăp pap, ia jrao, pơtô hrăm, djă ba tơlơi pơmin khăp ƀu-eng, bơwih brơi mơnuih ƀôn sang, biă ñu ƀing tơnap tap, amuñ hơmâo tơlơi truh kah hăng: ƀing čơđai rin, ƀu hơmâo pô kơnang; ƀing tha dŏ hơjăn, mơnuih hơmâo tơlơi ruă hŭi rơhyưt HIV/AIDS....

Khua mir sir Võ Văn Thưởng ăt kĭ hră jak iâu Ama prong Fancis rai čuă Việt Nam; čang rơmang mơnuih tui đăo Khŏp Việt Nam ngă hrŏm hăng hơdôm anom bruă Kơnuk kơna tañ dưi čơkă Ama prong rai čuă jơmư.

“Kâo hơdor amăng hră mơ-it mơ̆ng Ama prong Francis mơ-it kơ khul mơnuih đăo Khŏp Việt Nam tơdơi kơ kâo nao čuă Sang bruă đăo Khŏp, bưp Ama prong, hơmâo sa tơlơi, pran khăp ƀu-eng mơ̆ng Ơi adai hăng tơlơi khăp pap mơ̆ng ană mơnuih jing dua bơnah amăng prăk kăk. Laih anun kâo ăt hơdor amăng Hră Ơi adai ñu hơmâo tơlơi čih bơwih brơi mơnuih ƀôn sang ta ăt jing bruă bơwih brơi kơ Ơi adai mơn. Kâo lăng mơnuih ƀôn sang tui đăo Khŏp mơ̆ng Khul đăo Khŏp Huế hrơi blan rơgao hơmâo ngă klă bruă khăp kơ Ơi adai, khăp kơ mơnuih ƀôn sang, mơ̆ng anun pơtrut tui tơlơi đĭ kyar bơwih ƀong huă mơnuih mơnam mơ̆ng kual, mơ̆ng lŏn ia, djru ngă brơi tơlơi hơdip mơnuih ƀôn sang jai hrơi klă hloh”.

Khua mir sir Võ Văn Thưởng lăi rơđah, ƀơi mông Jơnum tal 8, Khul apăn bruă git gai Ping gah dêh čar hơmâo ngă Tơlơi pơtrun pơtrut tui gru grua, pran jua gum pơgôp abih bang, akŏ pơdong lŏn ia ta jai hrơi pơdrong sah, yâo mơ-ak. Tơlơi pơtrun lăi, gum pơgôp abih bang jing gru grua hiam yôm biă mă mơ̆ng djuai ania Việt Nam; jing jơlan ngă bruă yôm phun mơ̆ng Ping gah, jing pran kơtang mơ̆ng djuai ania. Khua mir sir lăi, kiăng tui anun khŏm hơmâo tơlơi gum pơgôp mơ̆ng abih bang mơnuih ƀôn sang, tơlơi gum pơgôp mơ̆ng mơnuih tui đăo hăng ƀu tui đăo, mơnuih tui đăo anai hăng mơnuih tui đăo pơkŏn; gum pơgôp kơplah wah mơnuih Việt Nam amăng dêh čar hăng mơnuih Việt Nam dŏ pơ čar rơngiao. Hăng pran jua tui anun, Khua mir sir čang rơmang, hăng tơlơi gơgrong ngă Khua wai lăng khul đăo Khŏp Huế, Khua khul đăo Khŏp Giuse Nguyễn Chí Linh amra pơtô ba, juh alum, pơtrut pran jua mơnuih ƀôn sang đăo khŏp ƀơi Huế pơtrut tui pran jua pơpŭ kơ Ơi adai, khăp kơ lŏn ia; Khăp kơ Ơi adai hăng khăp kơ mơnuih ƀôn sang đah mơ̆ng hơmâo lu hloh bruă ngă klă, đăo hiam; gum akŏ pơdong lŏn ia jai hrơi pơdrong sah, yâo mơ-ak.