Amăng mông dŏ bơ ră ruai mơak, jĕ giăm biă mă, dua bơnah lăng yôm hăng pơdah pran jua hok mơak kơ tơlơi pơđĭ kyar hiam klă, ngă giong tơlơi rô nao rai giăng mah Việt Nam-Japan laih anun jai hrơi jĕ giăm hloh kơ mơnuih ƀôn sang dua bơnah.

Khua mir sir lăi pơtong, tal nao čuă jơmư Việt Nam lăp hơdor pioh mơ̆ng ơi pơtao hăng bơnai pơtao thun 2017, hlăk anun ngă pơtao laih hăng tal čuă jơmư Việt Nam thun 2009 hlăk anun hlăk tơdăm phu ană pơtao, ăt kah hăng tal čuă jơmư blan 9 rơgao mơ̆ng tơdăm phu Akishino hăng hơbia hơmâo pioh glăi tơlơi hiam mơak amăng pran jua khua mua laih anun mơnuih ƀôn sang Việt Nam, djru ngă tong ten hloh tơlơi đăo kơnang, thâo hluh nao rai tơdruă plah wah mơnuih ƀôn sang dua bơnah hăng ba tơlơi ngă giăng mah Việt Nam-Japan đĭ nao amăng bruă ngă phrâo hlom bom hloh, yua tơlơi rơnuk rơnua hing ang ƀơi kual ASIA hăng ƀơi rŏng lŏn tơnah. Tlam hrơi anun, ƀơi sang pơtao, ơi pơtao hăng hơbia bơnai ơi pơtao git gai mông čơkă jum, pŭ asơi añăm ƀong huă tŭ jum khua mir sir Võ Văn Thưởng hăng bơnai ñu.