Pơphun tal nao čuă Hoàng thành Thăng Long, Khua mir sir Võ Văn Thưởng hrŏm hăng Khua mir sir Philippines Marcos nao pơhmư̆ Jơlan hơdră “Happy Tê̆t 2024” pơphun ƀơi Anih tong krah Hoàng thành Thăng Long. Pơ anai, Khua mir sir hơmâo lăi pơthâo hăng Khua mir sir Philippines kơ hrơi Tê̆t gru grua Việt Nam hăng lu gru grua phara, mut hrŏm hăng hrơi Tê̆t Việt Nam, hơmâo gơnam yôm, hơmâo tơlơi ngui ngor đưm amăng hrơi Tê̆t; hơmâo mơnŏng ƀong huă amăng hrơi Tê̆t; sem lăng jơlan hơdră adoh suang djă gru djuai ania. Tŏ tui, Khua mir sir Võ Văn Thưởng hrŏm hăng Khua mir sir Philippines Marcos nao čuă lăng anih gru đưm mơ̆ng Hoàng thành Thăng Long.

Pơđut tal hyu čuă ngui, ƀing khua hơmâo phin rup ƀơi anăp Rồng Điện Kính Thiên, jing sa amăng hơdôm gru lăp hơdor amăng tal rai čuă gưl kơnuk kơna pơ Việt Nam tal anai mơ̆ng Khua mir sir Philippines Marcos.