Ƀrô bơyan prap čơkă thun phrâo Giáp Thìn 2024, pơ ala brơi khua mua Ping gah, kơnuk kơna, Khua mir sir Võ Văn Thưởng mơ-it nao ƀing khua mua, ƀing apăn bruă, ling tơhan, mơnuih mă bruă amăng grup tơlơi pơpŭ hơ-ơč thun phrâo hiam klă hloh. Amăng mông mă bruă, Khua mir sir brơi thâo, tơdơi kơ giăm 35 thun akŏ pơjing hăng prong kơtang, ƀing apăn bruă amăng grup Viettel lêng gir run hrưn đĭ, khin hơtai glăm ba hơdôm bruă tơnap hăng tơlơi lông kơtang hloh. “Grup dưi pơ-ư ang lơm lăi nao ƀing apăn bruă kar hăng ling tơhan Viettel, pran jua Viettel, hrưn đĭ Viettel”, Khua mir sir lăng yôm hăng brơi thâo, tơlơi tơnap, tơlơi lông pơjing rai Viettel tui ră anai.

Khua mir sir rơkâo, hăng tơlơi gơgrong lĕ anom bơwih ƀong amăng khul ling tơhan rơnuk wa Hô, grup kiăng tŏ tui pran hrưn đĭ, amra tŭ mă hăng pơgiong djop mơta bruă jao hăng pran jua ngă tui tơlơi pơmĭn bơwih ƀong pơlir hăng pơhlôm rơnuk rơnua. Kơnong hăng Viettel, hrŏm hăng bruă bơwih ƀong, grup ăt kiăng pơlir hăng hơdôm bruă pơtom hiăp mơng dêh čar.