Jing khua git gai tơlơi bơwih ƀong huă blung a amăng APEC đĭ pơhiăp amăng mông bơkơtuai, Khua mir Võ Văn Thưởng lăi pơtong ayuh hyiăng pơplih sat lĕ bruă ječ amăng rŏng lŏn tơnah, kiăng hơmâo tơlơi gir run, tơlơi gơgrong kơđi čar kah hăng tơlơi mut hrŏm mơng djop dêh čar. Khua mir sir lăi pơthâo tơlơi pơmĭn mơng Việt Nam lăng bruă bong glăi ayuh hyiăng pơplih sat lĕ bruă yôm hloh amăng hơdră bruă pơđĭ kyar lŏn ia hăng ƀuăn ngă aset tui asăp hơƀak jrak dŏ “0” amăng thun 2050, hrŏ trun asăp mêtan, wai lăng glai rưng hăng pơplih yua apui lơtrik.

Khua mir sir rơkâo APEC hăng hơdôm dêh čar ngă gŏp pơtrut jơlan hơdră ngă hrŏm amăng yua apui lơtrik pơplih pơkra glăi hăng  ngă mơta hơdôm gơnong bruă tuh tia pơkra ming; pơđĭ kyar ngă hmua hơdjă hăng hơkrŭ wai lăng dram gơnam; tơlơi hơdip mơnuih mơnam hăng pơplih bơkơnar.