Akŏ bruă dưm dăp man pơdong tơring čar Quảng Ngãi rơwang thun 2021-2030, anăp nao truh thun 2050 hơmâo Khua dêh čar tŭ yap amăng lơ 22/11/2023, 3 tơlơi yak nao yôm phun: Quảng Ngãi pơđĭ kyar hluai tui hơdôm tơlơi gal phara-Anăp nao hơbô̆ bruă pơđĭ kyar tui kru phrâo hơđong kjăp; dua dong lĕ Quảng Ngãi-anih pơhưč phrâo, rôk tui jơlan bơwih ƀong huă akŏ phun kual Tong krah; hăng tal tlâo lĕ Quảng Ngãi ngă tui tơlơi dưi phara amra jing anih phun djru tui tlôn ƀơi tơdrun tum păn, tơlơi bơwih ƀong huă kual ia rơsĭ-bul pơtâo, glông bơwih ƀong huă kual Ngŏ-Yŭ. Dưm dăp hơmâo 4 glông bơwih ƀong huă yôm phun, 6 anih bơwih ƀong huă ba jơlan hlâo hăng 2 anih pơtrut pơđĭ kyar kơtang, 3 anih kar plơi prong. Tơring čar ba tơbiă hơnong pơkă anih hlong, pơkra ia jâu hăng apui lơtrik dêh čar amăng kual bơwih ƀong Dung Quất hăng pơđĭ kyar tơring glông bul pơtâo Lý Sơn jing Anih phun bơwih brơi tuai čuă ngui amăng kual ia rơsĭ-bul pơtâo.

Amăng mông ngă lơphet, Khua mir sir Võ Văn Thưởng hăng ƀing khua apăn akŏ, ƀing khua mua hơmâo pơphun mông ngă lơphet pok pơhai man pơkra jơlan Hoàng Sa-Dốc Sỏi; lăng ƀing khua mua tơring čar Quảng Ngãi jao Tơlơi pơsit tŭ yap tơlơi črâo trun tuh pơ alin hăng sa, dua akŏ bruă pơđĭ kyar plơi prong, tuh tia pơkra ming amăng tơring čar.