Amăng tal nao čuă jơmư, Khua dêh čar Japan, Kishida Fumio hăng bơnai ñu git gai jơnum ngă lơphet tŭ jum hăng pŭ asơi añăm čơkă prong biă mă Khua mir sir Võ Văn Thưởng hăng bơnai ñu. Dua čô khua ba akŏ hlâo grup khua mua kơnuk kơna dua bơnah jơnum bơkơtuai nao rai, pơtong glăi boh tơhnal ngă hrŏm amăng 50 thun rơgao tơdơi kơ akŏ pơjing pơtom hiăp giăng mah pŭ ƀăn laih anun pơdah thâo hơdră mă bruă gum hrŏm tong ten hloh pơ anăp adih.

Tơdơi kơ jơnum bơkơtuai dua bơnah khua mua hơmâo ba tơbiă sa tơlơi pôr hrŏm kơ bruă pơđĭ tui tơlơi ngă giăng mah Việt Nam-Japan jing bơnah ngă hrŏm hlom bom đơr hơr yua tơlơi rơnuk rơnua hăng pơdrong sah amăng kual ASIA laih anun ƀơi rŏng lŏn tơnah; dŏ lăng hrŏm bruă kĭ pơkôl lu hră pơar yôm ngă hrŏm plah wah hơdôm ding jum, anom bruă dua bơnah. Khua mir sir hơmâo mông bưp khua mua pơ ala mơnuih ƀôn sang Japan ƀơi gơnong dlông, dơnong yŭ. Biă mă ñu, Khua mir sir hơmâo nao čuă hăng đĭ pơhiăp lăi nao jơlan hơdră kơnuk kơna ƀơi sang bruă khua pơ ala mơnuih ƀôn sang dêh čar Japan, anom bruă čih tơlơi phiăn hơmâo gru phun sui thun hloh ƀơi kual ASIA...