Amăng hơdôm hrơi nao jơnum rơwang hrơi tơjuh jơnum khua mua pơprong APEC thun 2023, Khua mir sir Võ Văn Thưởng amra hrŏm hăng khua mua hơdôm boh dêh čar APEC pơčrông sai kơ bruă yôm phun bơdjơ̆ nao tơlơi bơwih ƀong amăng rŏng lŏn tơnah hăng amăng kual; ba tơbiă hơdôm tơlơi yak nao ngă hrŏm sĭ mơdrô, tuh pơ alin, boh thâo, pơplih pơčeh phrâo hăng djop bruă pơkŏn dong.

Việt Nam amra hrŏm hăng ƀing ding kơna pơtrut pơtom hiăp, pơjing, gơgrong, lăng yôm hơdră djop bơnah, ngă hrŏm, ngă bruă yua tơlơi pơđĭ kyar hơđong kjăp hăng pơdrong asah amăng kual. Khua mir sir Võ Văn Thưởng ăt amra nao jơnum hăng đĭ pơhiăp amăng Jơnum khua mua pơprong anom bơwih ƀong sĭ mơdrô, nao jơnum pơčrông sai kơplah wah khua mua hơdôm boh dêh čar APEC hăng dêh čar ngă gŏp, ƀing arăng jak iâu; nao jơnum khua mua pơprong amăng Tơlơi bơwih ƀong huă kual Ấn Độ Dương-Thái Bình Dương.