Khua mir sir Võ Văn Thưởng tŭ jum Khua mua Khul mơnuih rơgơi kơhnâo Japan - Việt Nam
Thứ sáu, 10:52, 01/12/2023
VOV/Siu H'Mai Pơblang
VOV/Siu H'Mai Pơblang
VOV4.VOV.VN - Tŏ tui hơdôm bruă mă ƀơi plơi prong Fukuoka amăng tal nao čuă sit nik dêh čar Japan, mơguah lơ 30/11, tui mông dêh čar anai, Khua mir sir Võ Văn Thưởng tŭ jum grup khua mua Khul mơnuih rơgơi kơhnâo Japan - Việt, yua nai tha prin Mitsuo Ochi, Khua sang hră gưl prong Hiroshima ba jơlan hrŏm hăng lu nai tha prin, nai prin tha, mơnuih kơsem min boh thâo amăng lu bruă mă glăk ngă bruă ƀơi hơdôm boh sang hră gưl prong, sang bruă kơsem min boh thâo hăng hơdôm anom bruă pơkŏn ƀơi Japan.
Hok mơ-ak lơ̆m bưp Nai tha prin Ochi hăng ding kơna amăng Khul, Khua mir sir lăi, hơdôm tơlơi truh kih mơ̆ng bruă ngă hrŏm dua bơnah Việt Nam - Japan hrơi blan rơgao hơmâo tơlơi gum djru prong biă mơ̆ng mơnuih ƀôn sang dua bơnah, amăng anun hơmâo Khul mơnuih rơgơi kơhnâo Japan - Việt Nam, biă ñu amăng bruă boh thâo ia rơgơi, pơtô hrăm.
Hăng bruă dua boh dêh čar pơđĭ tui tơlơi ngă hrŏm amăng abih bang bruă, anai jing hrơi mông gêh gal kiăng Khul pơtrut tui bruă ngă hrŏm hăng Việt Nam. Tŭ ư hăng Nai tha prin Ochi kơ bruă Khul čang rơmang ngă hrŏm hăng Việt Nam amăng djŏp bruă, Khua mir sir brơi thâo, anai jing hơdôm bruă mơ̆ Việt Nam kiăng biă mă, laih dong rơkâo Khul pơtrut tañ hơdôm bruă ngă tong ten amăng hrơi blan pơ anăp.
Viết bình luận