Khua mir sir, Võ Văn Thưởng hok mơak čơkă khua pơ ala mơnuih ƀôn sang dêh čar Bulgaria rai čuă Việt Nam ƀrô akŏ thun phrâo 2024, pơdah rai bruă lăng yôm hăng đăo kơnang bruă kơđi čar ngă giăng mah dua bơnah dêh čar. Khua pơ ala mơnuih ƀôn sang dêh čar Bulgaria, Rossen Dimitrov Jeliazkov lăi pơthâo hăng khua mir sir Võ Văn Thưởng boh tơhnal bơkơtuai hăng Khua pơ ala mơnuih ƀôn sang Việt Nam, Vương Đình Huệ laih anun lăi, tơlơi čang rơmang dua bơnah hur har pok pơhai ngă tui hơdôm tơlơi pơtrun kơ bruă ngă hrŏm hlăk hơmâo ră anai, amăng anun hơmâo mông jơnum mơ̆ng Jơnum min ngă hrŏm dua bơnah kơnuk kơna Việt Nam hăng Bulgaria.

Amăng tal rai čuă jơmư anai, grup khua mua mơ̆ng dêh čar Bulgaria amra nao čuă hơdôm boh tơring čar, kiăng ĕp lăng anŏ gêh găl či ngă hrŏm dua bơnah hơdôm tơring čar, pok prong anŏ gêh găl ngă hrŏm bơwih ƀong huă ăt kah hăng pơtrut mơnuih ƀôn sang rô nao rai jĕ giăm mơak; bơni kơ Việt Nam hơmâo mơ-it  nao ƀing kơhnâo kơhnăk pơtô tơlơi Việt ƀơi dêh čar Bulgaria. Khua mir sir, Võ Văn Thưởng lăi pơtong, Việt Nam  lăng yôm na nao tơlơi ngă giăng mah mơak klă hăng Bulgaria pơ anăp anai, dua bơnah kiăng pơtrut lu hloh bruă pơtom hiăp kơđi čar, čang rơmang dưi čơkă Khua mir sir Bulgaria ăt kah hăng khua mua amăng kơnuk kơna dêh čar Bulgaria rai čuă Việt Nam.