Ƀơi mông tŭ jum, Khua mir sir Võ Văn Thưởng lăng yôm tơlơi rô nao rai ngă hrŏm, giăng mah Việt Nam-Japan pơđĭ kyar kơtang, dơlăm hloh hăng tŭ yua sit nik amăng djop bruă, ngă hrŏm pơđĭ tui lu tal, lu anŏ pơkă hăng 100 krop bruă ngă pŭ ƀăn giăng mah djop tơring čar. Khua mir sir Võ Văn Thưởng lăng yôm tơlơi gir run mơ̆ng Khua tơring čar Fukouka hăng khua mua amăng kual Kyushu pơtrut ngă hrŏm hăng Việt Nam.

Khua mir sir rơkâo, Khua tơring čar Fukuoka hăng kual Kyushu gir ngă tui hơdôm mơta hră pơar hơmâo kĭ phrâo dua bơnah plah wah kual Kyushu hăng hơdôm tơring čar ƀơi Việt Nam, biă mă ñu hơdôm tơring čar hơmâo anŏ gêh găl pơkra ming gơnam sĭ mơdrô, ba yua boh thâo ia rơgơi ngă hmua, pơsir ia djah kiăng hơdjă rơgoh.