Ƀơi Bắc Kinh, Ding kơna Ding jum kơđi čar Ping gah dêh čar Khač, Kơ-iăng khua pơ ala mơnuih ƀôn sang dêh čar Khač Lý Hồng Trung hơmâo tŭ jum Kơ-iăng khua Jơnum min djŏp djuai ania mơnuih mơnam Việt Nam, Khua tal sa Khul hlăk ai mut phung rơnuk Hồ Chí Minh, Khua grup čơđai sang hră hlăk ai Việt Nam Bùi Quang Huy glăk nao čuă, mă bruă ƀơi dêh čar Khač. Pơhiăp ƀơi mông tŭ jum, ơi Lý Hồng Trung lăi, dua bơnah kiăng ngă tui khut tơlơi pơčrâo trun mơ̆ng khua mua dua Ping gah, dua kơnuk kơna kơ pơbưp nao rai hlăk ai Khač - Việt, pơtrut hlăk ai dua bơnah gum pơgôp pran jua amăng bruă akŏ pơdong Kual kah pơpha djru nao rai tơlơi hơdip pơgi kơdi Việt - Khač yom hloh.

Khua tal sa Khul hlăk ai mut phung rơnuk Hồ Chí Minh Bùi Quang Huy pơsit, bruă ngă “mriah, kơsem min hrăm hră” pơdah pran jua gir kơtir, gơgrong bruă nao hlâo mơ̆ng hlăk ai amăng bruă djă pioh, ngă kjăp hăng ƀu pơdơi pơđĭ tui tơlơi rô nao rai ngă gŏp yom amăng abih bang bruă plah wah Việt Nam hăng Khač, anăp nao akŏ pơdong Kual kah pơpha djru nao rai pơ anăp anai yom pơphă. Ơi Bùi Quang Huy đăo kơnang, mơ̆ng bruă anai, ƀing khua hlăk ai amra dưi pơbưp, pơčrông sai, hrăm nao rai, mơ̆ng anun pơđĭ tui tơlơi thâo hluh, bơbă tui tơlơi giăng mah pŭ ƀăn hăng pok prong tơlơi gêh gal ngă hrŏm kơñ pơgi ni anăp plah wah hlăk ai dua boh dêh čar.