VOV4.Jarai-Mơguah lơ 20/9, Grup hyu mă bruă mơ̆ng Gơnong dlông kơ bruă pơhlôm, pơgăn tơlơi soh sat ƀong kông ngăn, yua kơ Khua tơhan krên dên ơi Tô Lâm, ding kơna ding jum kơđi čar, Khua ding jum kông an, Kơ-iăng Khua git gai mơ̆ng gơnong dlông pơhlôm, pơgăn tơlơi soh sat ƀong kông ngăn ngă khua khul, hơmâo mông mă bruă hăng khua mua ping gah tơring čar Dak Lak kơ boh yôm phun lăi pơthâo boh tơhnal ĕp lăng mơ̆ng grup hyu mă bruă mrô 4 ƀơi anom bruă git gai ping gah tơring čar Dak Lak.

Ơi Nguyễn Xuân Trường, Khua anom bruă wai lăng tơring čar gah Anom bruă pơgăn ƀong kông ngăn dêh čar pơ ala kơ grup hyu mă bruă lăi pơthâo boh tơhnal ĕp lăng bruă mă

Tui hăng kơčăo bruă čih hră lăi pơthâo boh tơhnal sem lăng, rĭm thun, Khua mua git gai ping gah tơring čar Dak Lak lêng kơ ngă hră pơkă akŏ bruă hyu ĕp lăng tơgŭ kơđi tơlơi soh, brơi phat kơđi tơlơi soh ƀong kông ngăn, tơlơi soh bơwih ƀong huă, bruă mă amăng kơnuk kơna tơnap tap, lu mơnuih ƀôn sang đing nao hăng sem glăi boh tơhnal bơwih ƀong huă mơnuih mơnam ƀơi tơring čar, hơduah ĕp bruă ngă tui jơlan hơdră prong mơ̆ng ping gah tơlơi phiăn kơnuk kơna amăng bruă mă pơgăn tơlơi soh ƀong kông ngăn. Klah čun ƀơi mông jơnum, ding kơna ding jum kơđi čar, Khua ding jum kông an, Kơ-iăng Khua git gai mơ̆ng gơnong dlông pơgăn tơlơi soh ƀong kông ngăn rơkâo : Khua mua git gai ping gah tơring čar Dak Lak ăt khom git gai djop anom bruă ping gah, gong gai kơnuk kơna, djop sang bruă ping gah pơyŭ, pơtô lăi brơi thâo tong ten tơlơi pơtrun mơ̆ng ping gah tơring čar, jơnum min mơnuih ƀôn sang tơring čar kơ bruă pơhlôm, pơgăn tơlơi soh ƀong kông ngăn.

Khua tơhan krên dên ơi Tô Lâm, ding kơna ding jum kơđi čar, Khua ding jum kông an, Kơ-iăng Khua grup git gai pơhlôm pơgăn tơlơi soh ƀong kông ngăn dêh čar pơhiăp klah čun mông jơnum

Kơtưn bruă hyu sem lăng, pel ĕp djop sang bruă ping gah, ngă bruă pơgăn tơlơi soh ƀong kông ngăn, pơsir kơđi mơnuih ƀôn sang lăi pơthâo, tơlơi pơhing pơčut tơlơi soh laih anun brơi tơgŭ kơđi djơ̆ tơlơi phiăn. Pơđĭ tui boh tŭ yua sem lăng, pel ĕp, hơduah ĕp mă pơsir tơlơi dŏ tơdu. Laih dơ̆ng, Khua mua git gai ping gah tơring čar Dak Lak dăp mă hơdră, čih pơkra akŏ bruă pơsir tơlơi dŏ kơƀah laih anun ngă tui djop hơdôm tơlơi pơtă pơtăn mơ̆ng Hră lăi pơthâo grup pel ĕp mrô 4, tơlơi lăi pơthâo mơ̆ng Grup khua mua git gai mơ̆ng Gơnong dlông brơi pơhlôm, pơgăn tơlơi soh ƀong kông ngăn djơ̆ tơlơi phiăn. Kơnong hăng tơring čar Dak Lak, Khua mua git gai ping gah khom đing nao tong ten hloh amăng bruă git gai, pơčrâo bruă djop sang bruă kơnuk kơna kiăng tañ ƀuh hăng pơsir tơlơi pơhing lăi pơthâo ngă soh amăng bruă lŏn tơnah, kông ngăn lŏn glai, pơgang glai klô.

Nay Jek: Pơblang