Ƀơi mông bưp, Khua gong phun jua pơhiăp Việt Nam, ơi Đỗ Tiến Sỹ bơni hơ-ơč kơ ƀing khua mua anom bruă pơ ala kơ Việt Nam dŏ ƀơi dêh čar tač rơngiao, hơmâo pơđĭ bruă ngă khua phrâo pơprong, yom hloh, laih dơ̆ng lăi: Ƀing khua mua pơ ala dêh čar, pơ ala djop bruă mơ̆ng Việt Nam jing mơnuih ba tơlơi kiăng, bruă mă yom mơ̆ng ping gah, kơnuk kơna hăng mơnuih ƀon sang amăng bruă pơtom hiăp; jing mơnuih pơtruh nao rai plah wah  mơnuih ƀôn sang Việt Nam hăng dêh čar tač rơngiao. Gong phun jua pơhiăp Việt Nam lĕ anom bruă pôr tơlơi pơhing phun yom kơ Việt Nam hơmâo pơtui jua pơhiăp brơi mơnuih dêh čar tač rơngiao hmư̆, ngă tui bruă kơđi čar, mơnuih mơnam hăng 13 mơta tơlơi pơhiăp...

Gong phun jua pơhiăp Việt Nam jing anom bruă ba boh pơhiăp phun lu hơdră, lu mơta tơlơi pơhing “Việt Nam-Hrưn đĭ amăng rơnuk phrâo” kiăng pơtong rơđah tơlơi git gai mơ̆ng Ping gah djru kơ lŏn ia hrưn đĭ kơtang hloh, anăp nao amăng rơnuk phrâo, pơtong glăi kơnuih hiam hing ang hăng anăn apăn djuai ania ƀơi jar kmar. Khua Gong phun jua pơhiăp Việt Nam ơi Đỗ Tiến Sỹ čang rơmang ƀing khua mua anom bruă pơ ala kơ Việt Nam hơmâo ming pơkra glăi kiăng gêh găl, lăi pơthâo tañ bruă mă kiăo tui hăng rơnuk phrâo, pơthâo brơi hơgĕt bruă pơblih phrâo ƀơi jar kmar hlăk ngă, kiăng ba glăi boh tŭ yua kơ Việt Nam hăng Việt Nam dưi mut phung hrŏm jar kmar.