Tui hăng tơlơi pôr pơhing, tlam lơ 22/1/2026, Jơnum ruah khua ping gah đơ đam dêh čar tal 14 hơmâo ruah Khul khua apăn bruă Ping gah dêh čar tal 14, hơmâo 200 čô, amăng anun hơmâo 180 čô ding kơna sit nik hăng 20 čô ding kơna aka ƀu sit nik.

Mơguah anai lơ 23/1, Jơnum lok 1 Khul khua apăn bruă Ping gah dêh čar tal 14 pơphun jơnum či ruah Ding jum kơđi čar, ruah Khua git gai Ping gah, ruah Khua khua git gai Ping gah; hmư̆ tơlơi lăi pơthâo hơdră ruah khua mua prong mơ̆ng Ping gah, Kơnuk kơna laih anun pơgôp hiăp kơ bruă ruah mơnuih ngă khua amăng Ding kơna git gai Ping gah; ruah Jơnum min Pel ĕp kơđi gơnong dlông; ruah Khua Jơnum min Pel ĕp kơđi Gơnong dlông.

Khul khua apăn bruă Ping gah dêh čar tal 14 tŭ ư ha amăng plĕ ruah ơi Tô Lâm, Khua git gai Ping gah dêh čar tal 13 ăt ngă Khua git gai Ping gah dêh čar tal 14 dong mơn.

Khua git gai Ping gah ơi Tô Lâm pioh glăi lu bruă ngă lăp hơdor biă mă amăng bruă git gai Ping gah hăng črâo brơi jơlan hơdră đĭ kyar lŏn ia dơ̆ng mơ̆ng hrơi tơdơi kơ hơmâo Khul khua apăn bruă git gai Ping gah dêh čar tal 13 ruah ngă Khua git gai Ping gah Cộng sản Việt Nam tal 13 blan 8/2024.

Bruă dăp glăi anom bruă kơnuk kơna tui Tơlơi pơtrun mrô 18 - NQ/TW hơmâo ngă kơtang amăng ƀiă hrơi đôč, tơlơi pơplih prong hloh mơ̆ng hlâo truh kơ ră anai, laih anun boh than ba glăi prong biă, ƀu kơnong pơhrŏ trun mrô anom bruă, hrŏ trun mơnuih mă bruă, hrŏ trun prăk pioh mă yua re se đôč ôh mơ̆, yom hloh lĕ pơđĭ tui anŏ klă, tŭ yua mơ̆ng anih mă bruă, plai ƀiă ngă bruă hơmâo lu gưl, lu anih đơi, jao bruă hơmâo pơtrut tui kiăng jê̆ giăm mơnuih ƀôn sang, djơ̆ tui tơlơi mơnuih ƀôn sang kiăng, bơwih brơi mơnuih ƀôn sang klă hloh; hơmâo pok rai anih anom phrâo či pơđĭ kyar, pok pơhư brơi djŏp tơlơi hơmâo, tơlơi gêh găl, mă yua jing amuñ hloh, akŏ pơjing anih či pơđĭ kyar bơwih ƀong huă- mơnuih mơnam kơ thun blan pơ anăp.

Mơ̆ng rơnuč thun 2024 truh ră anai, Ding jum Kơđi čar hơmâo ngă 9 tơlơi pơtrun yom biă mă, amăng djŏp bruă akŏ phun mơ̆ng lŏn ia ta. Anai jing jơlan ngă bruă prong, ngă ƀơi abih bang, bơkơnar, pơƀuh tơlơi pơmin phrâo, lăng nao pơ anăp hăng tơlơi gir run ngă bruă kơđi čar prong biă mă mơ̆ng Ping gah; jing atur či ba lŏn ia ta hrưn đĭ, pơdrong sah, kjăp kơtang amăng rơnuk phrâo.

Tơlơi klah čun glăi drơi pô ơi Tô Lâm

Khua git gai Ping gah dêh čar tal 14

Thun tơkeng:  10/7/1957       Đah rơkơi/đah kơmơi: Đah rơkơi       Djuai: Yuan

- Plơi pla phun: Să Nghĩa Trụ, tơring glông Văn Giang, tơring čar Hưng Yên.

- Bruă sang anŏ ñu ngă: Mơnuih apăn bruă amăng bruă čar

- Lơ̆m phrâo ruah mut mă bruă hlăk: Čơđai sang hră.

- Hrơi hơmâo ruah ngă bruă amăng Kông an mơnuih ƀôn sang: 10/1974

- Hrơi mut amăng Ping gah: 22/8/1981.       Hrơi mut sit nik: 22/8/1982

- Bruă hơmâo pơtô pơjuăt:

        + Hrăm hră: 10/10.

        + Bruă hrăm apăn: Đại học An ninh nhân dân.

        + Gưl hrăm: Giáo sư, Tiến sĩ ( Nai prin tha, nai tha prin)

        + Tơlơi hrăm gah kơđi čar: Gưl prong hloh

        + Tơlơi hrăm pơhiăp tač rơngiao: Tơlơi Anglê C

Khua git gai Ping gah ơi Tô Lâm jing Ding kơna Ding jum kơđi čar tal 12, 13, 14; Ding kơna apăn bruă Ping gah dêh čar tal 11, 12, 13, 14; Ding kơna khul pơ ala mơnuih ƀôn sang dêh čar tal 14, 15.

Lơ 22.1.2026, ƀơi mông Jơnum ruah khua ping gah đơ đam dêh čar tal 14, ñu hơmâo ruah ngă Ding kơna apăn bruă git gai ping gah dêh čar tal 14, rơwang thun 2026-2031.

Mơguah lơ 23.1.2026, ƀơi mông Jơnum lok 1, Khul khua apăn bruă Ping gah dêh čar tal 14, ñu hơmâo ruah ngă ding kơna Ding jum kơđi čar tal 14 hăng hơmâo ruah ngă Khua git gai Ping gah dêh čar tal 14.