VOV4.Jarai - Lơ 7/10, Jơnum khua mua Ping gah lok 6, tal 13 mut amăng hrơi ngă bruă tal rơma. Yang hrơi mơguah, Khul khua gum bruă git gai Ping gah ngă bruă ƀơi sang jơnum prong, bơkơtuai kơ Hră lăi pơthâo glăi tơlơi bơwih ƀong huă - mơnuih mơnam, prăk kơnuk kơna thun 2022, him lăng kơčăo bruă pơđĭ kyar bơwih ƀong huă - mơnuih mơnam, prăk kơnuk kơna thun 2023 hăng  bruă prăk kơnuk kơna amăng 3 thun 2023-2025.

Mông jơnum Khua mua Ping gah lok 6.

Čơtlam, Khul khua gum bruă git gai Ping gah ngă bruă ƀơi grup, bơkơtuai kơ Kơčăo bruă dưm dăp, pơkă hơnong abih bang bruă rơwang thun 2021-2030, anăp nao pơ thun 2050. Tơdơi kơ anun, Ding jum kơđi čar jơnum hmư̆ tơlơi pơgôp hiăp, lăi pơthâo glăi hơdôm tơlơi mơng Ping gah dêh čar bơkơtuai kơ kơčăo bruă akŏ pơjing hăng ngă pơgiong Kơnuk kơna tui tơlơi phiăn xã hội chủ nghĩa Việt Nam amăng rơnuk phrâo; kơčăo bruă pơplih phrâo kơnuk kơna, mă yua măi mok phrâo truh pơ thun 2030, lăng nao pơ anăp truh thun 2045.

Siu H’Mai: Pơblang