Mơguah tom brơi, lơ 25/7, Ngă yang mut jôk mơyut Khua git gai ping gah ơi Nguyễn Phú Trọng dưi pơphun ƀơi hơdôm anih Sang ngă yang prong jôk mơyut dêh čar mrô 5 jơlan Trần Thánh Tông, ƀôn prong Hà Nội; ƀơi sang jơnum prong Thống Nhất, ƀôn prong Hồ Chí Minh hăng ƀơi plơi pla ñu pô să Đông Hội, tơring glông Đông Anh, ƀôn prong Hà Nội. Hơmâo grup khua mua mơ̆ng jar kmar nao jôk mơyut Khua git gai ping gah ơi Nguyễn Phú Trọng.

Grup khua mua mơ̆ng dêh čar Cuba yua kơ Khua git gai pơ ala mơnuih ƀôn sang dêh čar, Esteban Lazo Hernandez ba jơlan hlâo,  mut jôk mơyut Khua git gai ping gah ơi Nguyễn Phú Trọng.

Hlâo kơ anun, khua pơ ala mơnuih ƀôn sang dêh čar Cuba ăt pôr pơthâo pioh 2 hrơi h’ŭ gưl dêh čar kiăng hơdor glăi khua git gai Việt Nam.

Grup khua mua mơ̆ng dêh čar Hàn Quốc, yua Khua dêh čar ơi Han Duck Soo, khua djru bruă kơ Khua mir sir Hàn Quốc ba jơlan hlâo, mut jôk mơyut Khua git gai ping gah ơi Nguyễn Phú Trọng.

Grup khua mua khul pơlir hơbit kual Mi kô̆ (EU) yua khua pơ ala prong hloh, wai lăng gah bruă pơhlôm rơnuk rơnua hăng pơtom hiăp EU, Kơ-iăng Khua jơnum min kual Mi kô̆, ơi Josep Borrell ba jơlan hlâo, mut jôk mơyut Khua git gai ping gah ơi Nguyễn Phú Trọng.