Nao pơhmư̆ hơmâo ơi Nguyễn Trọng Nghĩa, Khua anom pơtô bruă Ping gah hăng Pơtô ba mơnuih ƀôn sang; yă Võ Thị Ánh Xuân, Kơ-iăng khua mir sir hrŏm hăng khua mua hơdôm ding jum, anom bruă gơnong dlông.

Pơhiăp ƀơi mông ngă lơphet, ơi Nguyễn Trọng Nghĩa kiăng tơring čar Bình Định hăng hơdôm boh tơring amăng Kual V pơđĭ tui bruă ngă hrŏm; ngă klă bruă “Hơdor tơngia”, “Mơñum ia hơdor kơ pô klơi”, pơphun nao čuă jơmư, tơña bla, pơpŭ kơ sang anŏ hơmâo anăn kơnuk kơna djru, sang anŏ ƀing khua, ling tơhan, mơnuih ƀôn sang hăng ƀing čơđai sang hră nao pơ kual Kơdư hơdip mơda, mă bruă. Laih dong kiăng pôr pơhing dlăm hloh kơ gru yôm anai amăng abih bang Ping gah, ling tơhan, mơnuih ƀôn sang, biă ñu lĕ rơnuk hlăk ai, pơsit tơlơi črâo bruă lăp djơ̆ mơ̆ng Ping gah, Khua mir sir Hồ Chí Minh hăng tơlơi djai drơi pô, pơyơr pran jua prong mơ̆ng ơi yă, rơnuk nao hlâo. Bruă pơtrut tui boh yôm mơ̆ng bruă pơƀut nao dŏ pơ anih pơkŏn kiăng pơlir hăng bruă akŏ pơjing, pơtŏp rơguăt rơnuk ngă hơkrŭ tơdơi, djơ̆ hăng tơlơi kiăng amăng rơnuk pơplih phrâo hăng pơđĭ kyar./.