Khua čih pioh ƀirô pơ ala mơnuih ƀôn sang dêh čar, Khua wai lăng anom bruă pơ ala mơnuih ƀôn sang ơi Bùi Văn Cường lăi pơthâo glăi bruă prăp rơmet. Tui anun, khua mua pơ ala mơnuih ƀôn sang amra pioh 2 hrơi ha mơkrah či tơña hăng lăi glăi tơlơi tơña. Khua mua amra krăp lăng bruă mă mơ̆ng hơdôm anom bruă hăng 10 tơlơi pơtrun amăng rơwang bruă tal 14 hăng tal 15 kơ krăp lăng bruă mă hăng tơña. Pơhiăp ƀơi mông mă bruă, Khua dêh čar ơi Phạm Minh Chính bơni kơ bruă prăp rơmet mông tơña hăng lăi glăi tơlơi tơña ƀơi mông Jơnum lok 6, ƀirô khua pơ ala mơnuih ƀôn sang dêh čar tal 15.

Mơ̆ng mông jơnum anai, djru ĕp ƀuh tơlơi tơña tŭ yua hloh, mơ̆ng anun pơđĭ tui anŏ klă, tŭ yua bruă mă hăng tơlơi sit, đăo kơnang mơ̆ng Khua mua pơ ala mơnuih ƀôn sang dêh čar. Khua git gai pơ ala mơnuih ƀôn sang dêh čar ơi Vương Đình Huệ brơi thâo, kơ hơdră ngă bruă amra pơphun tơña hăng lăi glăi tơlơi tơña tui 4 mơta bruă: Bơwih ƀong abih bang; bơwih ƀong kiăo tui bruă mă; gru grua, mơnuih mơnam; tơlơi phiăn, bruă pơgang hưp ham ƀong kông ngăn, jŭ yap prăk Kơnuk kơna. Hrơi pioh hơduah tơña rim bruă mă năng ai 160 truh kơ 170 mơnit, samơ̆ lơ̆m pơphun tơña ăt pơplih djơ̆ hăng tơlơi kiăng mơn.