Ƀơi mông pơbưp, Khua ping gah, Khua mir sir ơi Tô Lâm bơni biă kơ tơlơi gum pơgôp mơ̆ng ƀing đah kơmơi ngă khua pơ ala mơnuih ƀon sang dêh čar, laih dong lăi kiăng pơtrut tui tơlơi rơgơi, pran jua khin pơmin khin ngă, tơlơi gơgrong mơ̆ng ƀing đah kơmơi amăng bruă čih pơkra tơlơi phiăn, krăp lăng hăng pơsit hơdôm bruă pơprong mơ̆ng lŏn ia. Khua mua pơ ala mơnuih ƀon sang dêh čar tal XVI hơmâo 150 čô đah kơmơi ngă khua, hơmâo 30% amăng mrô khua.

Khua ping gah, Khua mir sir čang rơmang, kiăng ƀing adơi amai ngă khua gum ngă bruă tañ amăng bruă kơsem min, čih pơkra hơdră mă bruă; ngă rơđah phun tơhnal, anŏ djơ̆ hrŏm, hăng tơlơi dưi ngă tui hơdôm tơlơi pơkôl pơkă mơ̆ng tơlơi phiăn. Laih dong kiăng hơđong tơlơi pơmin, ba tơbiă tơlơi pơčeh phrâo klă kơ abih bang, ƀu brơi ngă klă kơ hơdôm khul grup đôč ôh. Khua ping gah, Khua mir sir ăt rơkâo ƀing đah kơmơi ngă khua nao tơl plơi pla, pơhmư̆ tơlơi rơkâo, tơlơi kiăng mơ̆ng mơnuih ƀon sang. Biă ñu lĕ, kiăng gir pơsit hơdôm hơdră djru brơi đĭ kyar bơwih ƀong huă - mơnuih mơnam, prăk kăk thun 2027, pơhlom tơlơi dưi hăng tơlơi gêh găl kơ ƀing đah kơmơi hrơi, hăng mơnuih ƀon sang,  djru bruă đĭ kyar lŏn ia ta truh pơ thun 2030, anăp nao pơ thun 2045.