Pơhiăp ƀơi mông ngă lơphet, Khua ping gah, Khua mir sir ơi Tô Lâm lăi rơđah, kiăng git gai lŏn ia ta đĭ kyar, Ping gah khŏm pơplih na nao tơlơi pơmin, čih pơkra tơlơi djơ̆ tơlơi găl. Amăng 30 thun, Khul čih tơlơi pơtô djơ̆ bruă kơđi čar hơmâo pơsit rơđah tơlơi gơgrong bruă nao hlâo, pơtô brơi jơlan gah bruă kiăng ngă kơ tơlơi pơtô djơ̆ bruă kơđi čar; tum pơƀut ia rơgơi mơ̆ng ƀing khua, mơnuih wai lăng, mơnuih kơhnăk boh thâo, ƀing khua ping gah hăng mơnuih ƀon sang. Lŏn ia ta glăk pok pơhai ngă tui Hră pơtrun Jơnum ping gah dêh čar tal 14, gir dưi ngă hơdôm hơnong pơkă đĭ kyar lŏn ia truh pơ thun 2030, hăng thun 2045, wơ̆t hăng 100 thun pơ anăp dong. Anŏ kiăng ngă lĕ đĭ kyar kơtang, hơđong; pơđĭ tui tơlơi dưi gơgrong mă pô, pơhlom ngă bruă djơ̆ hrơi pơkă, bơkơnar mơnuih mơnam hăng tơlơi hơdip Mơnuih ƀon sang.

Khua ping gah, Khua mir sir ơi Tô Lâm rơkâo Khul čih tơlơi pơtô djơ̆ bruă kơđi čar pơsit hăng pơđĭ tui tơlơi gơgrong bruă, jing khul nao hlâo, akŏ phun amăng bruă kơsem min tơlơi gêh găl, tơlơi pơtô djơ̆, pơƀut glăi djŏp tơlơi hơmâo sit laih anun pơphô brơi Ping gah, lăi pơthâo hlâo hăng ƀuh hơdôm bruă phrâo hơmâo. Khul pơƀut kơsem min gah tơlơi pơtô djơ̆, tơlơi găl bruă kơđi čar akŏ phun, hăng hơdôm bruă phrâo, kiăng ječ ameč mơ̆ng lŏn ia, mơ̆ng rơnuk anai. Laih dong pơplih tơlơi pơmin mơ̆ng khua mua git gai, pơplih bruă wai lăng dêh čar; pơsir brơi lăp djơ̆ plah wah dah Kơnuk kơna, anih sĭ mơdrô hăng mơnuih mơnam; pơđĭ tui boh tŭ yua mă bruă, mă yua djơ̆ lăp prăk kăk, mơnuih mă bruă.