Ƀơi să Hòa Phú, Anom bruă ngă hră pơ-ar hơmâo pơkra brơi hră pơ-ar djơ̆ hrơi pơkă jing rơbêh kơ 99%, dŏ glăi 28 pok hră kaih lĕ gah bruă lŏn tơnah. Hơbô̆ bruă “Grup ngă bruă hơdeč” hăng “Plơi mrô - Gêh gal, rơđah rơđông” hơmâo ngă, djru brơi mơnuih ƀôn sang pơ kual ataih dưi nao ngă hră amuñ hloh.

Ƀơi phường Ea Kao, Anom bruă hơmâo 10 čô mơnuih apăn bruă, prăp rơmet djŏp măi mok, pơkra brơi rơbêh 2.500 pok hră, dưi pơkra djơ̆ hrơi pơkă hơmâo 99,7%. Phường glăk mă yua boh thâo ia rơgơi ană mơnuih pơčeh, djru brơi ană plơi mơit hră hăng sem lăng hră pơ-ar tui mrô QR, laih dong pơtruh hăng hơdôm glông bơwih pơkra hră pơ-ar “Dak Lăk mrô”.

Mơ̆ng bruă hyu sem lăng, ơi Lương Nguyễn Minh Triết, Khua ping gah tơring čar Dak Lăk kiăng 2 boh tơring anai lăng glăi abih bang, tong ten, ngă djơ̆ akŏ tlôn, tuh pơ alin boh thâo ia rơgơi, măi mok, pơtŏp brơi ƀing mă bruă kiăng anom bruă dưi ngă bruă tŭ yua, sit nik, djru akŏ pơdong gong gai mrô amăng să phường.