Lơ 27/11, gah yŭ tơlơi git gai mơ̆ng Khua git gai wai lăng pơ ala mơnuih ƀôn sang dêh čar ta Vương Đình Huệ, Khua pơ ala mơnuih ƀôn sang pơphun bơkơtuai ƀơi sang rông kơ rơwang bruă Tơlơi phiăn plơi prong jưh jom (pơplih pơkra) hăng hơdôm tơlơi lăi pơthâo glăi mơ̆ng Gong gai dêh čar kơ: Klah čun pơphô hlâo hơdră bruă gong gai ƀôn prong ƀơi ƀôn prong Hà Nội, ƀôn prong Đà Nẵng hăng bôh tơhnal 3 thun ngă tui pơphun bruă gong gai ƀôn prong ƀơi ƀôn prong Hồ Chí Minh.

Lu khua pơ ala tŭ ư pơplih pơkra Tơlơi phiăn plơi prong jưh jom kiăng pơplih phrâo Tơlơi pơtrun pơsit 15 mơ̆ng Ding jum kơđi čar kơ jơlan gah, bruă pơđĭ kyar plơi prong jưh jom Hà Nội truh thun 2030, tơhnal lăng nao truh thun 2045. Ƀing khua pơ ala lăi lĕ, hră čih pơkra Tơlơi phiăn plơi prong jưh jom (pơplih pơkra) hmâo rơwang pơplih pơkra pơhlôm laih, abih bang kah hăng hơdôm bruă, ƀu kơnong hơdră pơkă, hơdră bruă gum djru pha ra ha jăn amăng sa dua mơta bruă, kah hăng pơkă pơphun bruă gong gai, bruă apăn kơ gong gai ƀơi plơi prong jưh jom, ăt kah hăng bruă pơlir nao rai, pơđĭ kyar kual plơi prong jưh jom mơn./.