Tô̆ tui jơlan hơdră Tal jơnum lok 6, hrơi anai (30/10) Khua pơ ala mơnuih ƀôn sang pơphun rơwang hrơi tơjuh mă bruă tal 2. Amăng hrơi anai, ƀing khua pơ ala Khua pơ ala mơnuih ƀôn sang bơkơtuai ƀơi sang rông kơ bruă pok pơhai ngă tui hơdôm Tơlơi pơtrun pơsit mơ̆ng Khua pơ ala mơnuih ƀôn sang kơ hơdôm Jơlan hơdră pơkă mơ̆ng lŏn ia kơ pơdŏng plơi pla phrâo rơwang 2021-2023, hrŏm trun ƀun rin kơjăp phik rơwang 2021-2025, pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang 2021-2030.

Truh rơnuč blan 8 thun anai, abih bang prăk pơsir mơ̆ng 3 jơlan hơdră pơkă mơ̆ng dêh čar lĕ 16 rơbâo 300 klai prăk, phrâo hmâo mă giăm truh 48% kơčăo bruă. Ngăn rơnoh pơpha hyu akă lăp djơ̆ ôh bơhmu hăng tơhnal ba tơbiă, tơlơi rơkâo ba tơbiă; pơpha ngăn rơnoh tuh pơplai pơđĭ kyar ngăn drăp kơnuk kơna kaih (3 blan tal 2 thun 2022 phrâo jao); mrô prăk pơhrua hrŏm mơ̆ng tơring čar, ƀôn prong akă djơ̆. Hrŏ trun ƀun rin akă tui tơhnal ba tơbiă lu bơnah, kơjăp phik, biă ñu ƀơi kual neh wa djuai ania ƀiă, kual čư̆ siăng. Kơ-iăng Khua dêh čar, ơi Trần Lưu Quang brơi thâo: Gong gai dêh čar ta ba tơbiă hăng Khua pơ ala mơnuih ƀôn sang mă mơ̆ng ngăn rơnoh thun 2023 hơdai nao thun 2024 hăng rơkâo hơdôm tơring čar, ƀôn prong ƀu kơnong kơ pơsir abih ngăn rơnoh ôh mơ̆ anô̆ kơjăp ring bruă khom pơhlôm./.