Pơhiăp pok phun mông Jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Tal jơnum lok 9, Khua pơ ala mơnuih ƀôn sang dêh čar ta tal 15 pok phun amăng lơ 5/5 (tơdơi kơ tal pơdơi Lơphet lơ 30/4 hăng lơ 1/5), dưi pơpha jing 2 tal pioh pel ĕp, pơsit mrô bruă lu biă, lu bôh yôm hmâo tơhnal kiăng ječ, yôm phăn phrâo dưi hmâo Ping gah dêh čar tŭ ư hơdră pơtrun amăng mông jơnum lok 11.

Pơkă hlâo tal jơnum anai amra pel ĕp, pơsit 45 bôh yôm tơlơi phiăn bơdjơ̆ nao dưm dăp anom bruă čar hơdôm gưl, rơbô̆t jơlan gah mă bruă; 14 djuai bôh yôm lăi nao bơwih ƀong - mơnuih mơnam, ngăn drăp kơnuk kơna, lăng tui hăng hơdôm tơlơi yôm phăn pơkon. Amăng mông Jơnum, Khua dêh čar ta ơi Phạm Minh Chính pơtŏng sit: Gong gai dêh čar amra gir run đut hlah, hmư̆ lăng hăng tŭ mă tơpă tơlơi gum pơhiăp pioh Tal jơnum ba glăi bôh tơhnal klă hloh. Hơdôm bôh yôm lăi pơthâo kơ Khua pơ ala mơnuih ƀôn sang dêh čar hmâo lăng glăi tŏng ten, tui pran jua ba tơbiă bôh tŭ yua kơ lŏn ia, djuai ania nao hlâo. Khua dêh čar pơdah pran jua đăo kơnang, hăng tơlơi črâo ba mơ̆ng Ping gah, tơlơi pơlir hơbit mơ̆ng Gong gai, tơlơi tŭ ư hrŏm mơ̆ng Khua pơ ala mơnuih ƀôn sang, tơlơi dŏng yua mơ̆ng mơnuih ƀôn sang, Tal jơnum lok 9 amra truh kih klă hiam; lar hyu dơlăm, prong gah tơhnal yôm phăn mơ̆ng hơkrŭ rơbô̆t jơlan mă bruă čar./.