Tŏ tui hrơi mông jơnum lok 6, Lơ 3/11, Khua pơ ala mơnuih ƀôn sang pioh ha hrơi kiăng pơčrông sai ƀơi sang jơnum kơ sa, dua boh tơhnal dŏ pơmĭn phara amăng tơlơi phiăn lŏn mơnai (čih pơkra glăi). Tui him lăng, Khua pơ ala mơnuih ƀôn sang amra tŭ yap mă yua tơlơi phiăn lŏn mơnai (čih pơkra glăi) amăng jơnum tal anai. Samơ̆, truh ră anai, črăn tơlơi phiăn lŏn mơnai (čih pơkra glăi) ăt dŏ lu tơlơi pơmĭn phara, sit biă ñu tơlơi pơkă pơhrui glăi lŏn mơnai yua tơlơi dưi lŏn ia, mơnuih mơnam; kơ bruă sĭ mơdrô lŏn ngă hmua, sit biă ñu hmua pơdai; kơ tơlơi dưi hăng tơlơi glăm ba amăng mă yua lŏn mơnai mơng mơnuih ƀon sang Việt Nam dŏ hơdip pơ tač rơngiao; kah hăng hơdră pơkă lăng nua lŏn…

Ăt amăng mơguah lơ 3/11, ƀing khua mua pơgôp hiăp amăng bruă dưm dăp mă yua lŏn mơnai; kơ bruă ngă tui akŏ bruă sang dŏ, anih sĭ mơdrô, akŏ bruă man pơdong sang dŏ hăng bơwih ƀong sĭ mơdrô; bơwih bơwang; kơ bruă pơđĭ kyar, mă yua hăng wai lăng lŏn mơnai; kơ bruă ngă hră pơ-ar brơi rĭm boh sang anŏ, ƀing mơnuih glăk yua lŏn aka ƀu hơmâo hră pơ-ar, huăi ngă soh tơlơi phiăn yua lŏn mơnai, ƀu djơ̆ ƀing jao lŏn soh glăi…Lu khua mua lăi pơtong, anai lĕ tơlơi phiăn yôm biă mă, rơkâo khŏm pơmĭn tong ten hlâo kơ mă yua. Bruă mă yua tơlơi phiăn anai kiăng pơhlôm klă hloh, djơ̆ hăng tơlơi rơkâo sit nik hăng dưi ngă tui.