Tlam mơmŏt lơ 24/10, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ git gai mông čơkă Khua git gai pơ ala mơnuih ƀon sang gơnong glông dêh čar Kur ơi Samdech Say Chhum hăng ƀing khua mua pơprong mơng Ƀirô Khua pơ ala mơnuih ƀon sang gơnong glông dêh čar Kur. Tơdơi kơ mông čơkă, dua bơnah hơmâo pơphun jơnum bơkơtuai. Amăng mông jơnum, Khua git gai pơ ala mơnuih ƀon sang dêh čar ơi Vương Đình Huệ hăng ơi Samdech Say Chhum lăng glăi tal rai čuă anai lĕ hrơi mông yôm phăn kiăng hơkrŭ glăi hăng pơđĭ kyar tơlơi rô nao rai dua boh dêh čar ha guai, giang mah, ngă hrŏm djop mơta kơplah wah Việt Nam - Kur lăi hrŏm kah hăng kơplah wah anom bruă čih pơkra tơlơi phiăn dua bơnah hnun mơn.

Mông bưp

Khua git gai pơ ala mơnuih ƀon sang dêh čar ơi Vương Đình Huệ čang rơmang, dua boh dêh čar kiăng pơtrut tañ “Akŏ bruă djop mơta pơlir bơwih ƀong huă Việt Nam - Kur truh thun 2030”; tŏ tui ngă gêh gal brơi anom bruă tuh pơ alin mơng rĭm boh dêh čar dưi ngă hrŏm. Gum hrŏm wai lăng tŭ yua amăng wai pơgang guai lŏn ia, wai lăng kjăp ƀing mơnuih ngă soh hăng ƀing mut nao rai lŏn ia ča čot, ƀing sĭ dŏp mơnuih. Gah Ƀirô Khua pơ ala mơnuih ƀon sang dêh čar Việt Nam hăng bruă ngă hrŏm kơplah wah dua bơnah, dua čô khua lêng kơ čang rơmang, dua bơnah pơlăi nao rai tơlơi thâo thăi amăng kơsem min, pơphô bruă djop mơta hăng pơphun djop bruă amăng Ƀirô Khua pơ ala mơnuih ƀon sang dêh čar; tŏ ngă tui hơdôm hơdră gum hrŏm amăng hơdôm mông jơnum djop bơnah…