Tal nao čuă jơmư Australia anai mơ̆ng Khua git gai pơ ala mơnuih ƀôn sang dêh čar ta ơi Vương Đình Huệ amra pơtrut tơlơi rô nao rai ngă giăng mah dua boh anom bruă khua pơ ala mơnuih ƀôn sang hăng hơmâo yak nao phrâo hloh, pok lu tơlơi čang rơmang, pơjing pran kơtang pơtrut bruă ngă hrom ba glăi boh tŭ yua hloh amăng djop bruă, djop mơta, pơgang ba anŏ tŭ yua kơ mơnuih ƀôn sang dua bơnah. Thun blan rơgao, tơlơi ngă giăng mah dua bơnah pơđĭ kyar laih, biă mă ñu mơ̆ng thun 2017, akŏ pơjing bruă ngă pŭ ƀăn yôm phara.

Bruă ngă hrom kơđi čar jai hrơi jĕ giăm thâo hluh tơdruă, pơblih nao rai khua mua čuă jơmư trư găn: Ping gah, khua pơ ala hăng kơnuk kơna, mơnuih ƀôn sang nao rai ngă gơyut gơyâo. Bruă ngă hrom bơwih ƀong huă, sĭ mơdrô, tuh pơ alin pơđĭ kyar klă. Rơnoh prăk sĭ mơdrô dua bơnah pơhrui glăi đi na nao mah bơbeč djơ̆ tal klin kheng; thun 2021 rơnoh pơhrui glăi 12,4 USD, đĭ tui 50% pơkă hăng thun 2020; Australia djru Việt Nam rơnoh prăk ODA hơđong. Phrâo anai, Australia lăi pơthâo rơnoh prăk yua amăng thun 2022-2023, tui hăng anun, djru kơ Việt Nam prăk ODA truh 92,8 klăk AUD, dolar Australia.