Tŏ tui jơlan hơdră jơnum lok 10, lơ 22/10, Khua pơ ala mơnuih ƀôn sang dêh čar pơčrông sai ƀơi grup kơ črăn tơlơi phiăn čih pơkra glăi, pơhrua sa, dua črăn amăng tơlơi phiăn pơtô pơjuăt, tơlơi phiăn pơtô pơjuăt sang hră gưl prong hăng tơlơi phiăn pơtô bruă mă. Lu Khua pơ ala mơnuih ƀôn sang đing nao kơ bruă čih pơkra hơdrôm hră pơtô pơjuăt brơi hrup yua hrŏm amăng đơ đam dêh čar, pơhlôm brơi kơ klă hăng lăp djơ̆ tơlơi sit nik.

Črăn tơlơi phiăn pơtô pơjuăt (pơplih pơkra glăi) lăi pơton nao kơ akŏ pơjing bruă pơtô pơjuăt đơ đam pok phư, pơlir hơbit, pơhrua sang hră pơtô bruă mă, ngă gêh gal kiăng ƀing čơđai dưi hrăm hră rah hăng dưi hrăm bruă rah. Tơlơi phiăn ăt rơkâo ngă amuñ ƀiă ngă pơ-ar, lui hĭ bruă jao ƀăng hrăm giong gưl dua hăng hơdai nao jao ƀăng hrăm abih gưl tlâo mơng Khua gơnong bruă pơtô pơjuăt hơdai nao Khua sang hră. Hơdôm tơlơi pơgôp hiăp đing nao pơgiong tơlơi pơkă kiăng hrưn đĭ klă dong mơnuih mă bruă, lăp djơ̆ hăng tơlơi rơkâo pơđĭ kyar lŏn ia amăng rơwang phrâo.