Tŏ tui jơlan hơdră jơnum ƀu tui tơđar lok 9, Khua pơ ala mơnuih ƀôn sang dêh čar tal 15, hrơi anai (15/2) ƀing khua mua pơčrông sai ƀơi sang jơnum kơ črăn tơlơi phiăn pơphun bruă gong gai ƀon lan (čih pơkra glăi); akŏ bruă pơhruă bruă pơđĭ kyar bơwih ƀong huă-mơnuih mơnam thun 2025 hăng hơnong pơkă pơđĭ kyar 8% pơ glông; hơdră bruă tuh pơ alin man pơkra jơlan rơdêh treng Lào Cai-Hà Nội-Hải Phòng; črăn tơlơi pơtrun mơng Khua pơ ala mơnuih ƀôn sang dêh čar ngă lông lăng sa, dua hơdră bruă yôm phara, sit biă ñu kiăng pơđĭ kyar jơlan rơdêh treng amăng ƀôn prong ƀơi Hà Nội, Hồ Chí Minh.

Akŏ bruă pơđĭ kyar jơlan rơdêh treng amăng ƀôn prong truh thun 2045, him lăng abih tih prăk tuh pơ alin mơng Hà Nội lĕ giăm 62 klai đôlar Mi hăng ƀôn prong Hồ Chí Minh giăm 67 klai đôlar Mi. Hăng hơnong pơkă blung a hơmâo Hà Nội hăng Hồ Chí Minh ba tơbiă lĕ, truh thun 2035 dưi mă yua 17 ară jơlan, djop ară jơlan glông giăm 752 km, pơhlôm mơng 35-50% ară jơlan pơgiăng hyu tuai. Truh thun 2045 ă yua dong 7 ară jơlan, 4 ară jơlan glông pơhrua dong giăm 335 km, pơhlôm mơng 50-60% bruă pơdŭ pơgiăng mơnuih mơnam. Mơng tơlơi sit nik pok pơhai hơdôm ară jơlan rơdêh treng amăng thun blan rơgao, ƀing khua mua brơi thâo, bruă ba tơbiă hơdră bruă phara lĕ kiăng hloh. Hà Nội hăng Hồ Chí Minh lĕ bơnah pơđĭ kyar kơtang, dua anih ba jơlan hlâo amăng bơwih ƀong huă, dưi ngă lar prong tui. Bruă ba tơbiă tơlơi pơtrun pơsit hơdră bruă phara kiăng pơđĭ kyar jơlan rơdêh treng ƀôn prong ƀơi Hà Nội, Hồ Chí Minh djru mă yua djop ngăn rơnoh, ngă gêh gal brơi dua boh ƀôn prong ngă truh kih hơnong pơkă pơđĭ kyar jơlan rơdêh treng ƀôn prong  pơhlôm brơi kơ klă, hơđong kjăp.