Tơdơi kơ mông čơkă, Khua git gai Ping gah dêh čar ơi Tô Lâm hơmâo mông bưp ƀiă mông hăng Khua dêh čar Lawrence Wong, tơdơi anun 2 čô khua amra nao jơnum bơkơtuai gưl khua mua pơprong kiăng pơčrông sai hăng ba tơbiă hơdôm hơdră bruă kiăng ngă dơlăm tui tơlơi rô nao rai kơplah wah dua Ping gah, ngă atur kơđi čar kjăp phik tơlơi rô nao rai dua bơnah pơ anăp.

Amăng mông jơnum bơkơtuai, dua bơnah tŭ ư hrŏm hơdôm jơlan gah pơprong, ba tơlơi rô nao rai ngă hrŏm yôm phăn djop mơta Việt Nam-Singapore pơđĭ kyar sit nik, tŭ yua, đing nao kơtưn pran đăo gơnang kơđi čar hluai tui bruă pơbưp nao rai djop gưl; sit biă ñu lĕ gưl khua mua pơprong; pok prong hăng ngă dơlăm ƀiă dong bruă ngă hrŏm bơwih ƀong huă, sĭ mơdrô, apui lơtrik hơdjă; kơtưn ngă hrŏm amăng bruă ling tơhan, gru grua, pơtô pơjuăt, tuai čuă ngui hăng pơbưp nao rai mơnuih ƀôn sang. Kơ hơdôm bruă amăng kual, dua bơnah tŭ ư kơtưn gum pơgôp ASEAN, đing nao pơđĭ kyar hơđong kjăp mơng hơdôm kual anet amăng kual, amăng anun hơmâo kual Mê Công, mơng anun pơgôp prong brơi kual ASEAN prong kơtang, pơdrong asah hăng pơđĭ kyar hơđong kjăp, ngă tui tơlơi gơgrong phun amăng kual.