Tŏ tui hrơi mông jơnum lok 4, Khua pơ ala mơnuih ƀon sang dêh čar tal XV, mơguah lơ 24/10, ƀơi Hà Nội, Khua pơ ala mơnuih ƀon sang dêh čar pơčrông sai ƀơi sang jơnum kơ sa, dua boh tơhnal dŏ pơmĭn phara amăng črăn tơlơi phiăn khăm pơjrao (čih pơkra glăi). Črăn tơlơi phiăn khăm pơjrao čih pơkra glăi tơdơi kơ pơplih hơmâo 12 tơlơi hăng 121 črăn, lu ƀiă rơbêh 15 tơlơi pơhmu hăng črăn mơ-it nao Khua pơ ala mơnuih ƀon sang dêh čar amăng jơnum lok 3, lu boh tơhnal hơmâo pơgiong, samơ̆, dŏ sa, dua boh tơhnal kiăng hmư̆ tui tơlơi pơgôp hiăp, pơplih pơkra.

Mông jơnum lok 4, Khua pơ ala mơnuih ƀon sang dêh čar tal XV

Tơlơi phiăn khăm pơjrao lĕ tơlơi phiăn yôm phiăn mơng gơnong bruă ia jrao, anăp nao bruă wai lăng hăng pơđĭ kyar hơđong kjăp mơng bruă pơgang, bơwih brơi tơlơi suaih pral kơ mơnuih ƀon sang, amra bơbeč prong nao mơnuih ƀon sang kah hăng hơdôm anom bruă ia jrao, ƀing ơi ia jrao, nai ia jrao; hơmâo mơnuih ƀon sang, gơnong bruă ia jrao čang rơmang, hơmâo lu tơlơi čang rơmang pơplih klă dong amăng bruă bơwih brơi tơlơi suaih pral kơ mơnuih ƀon sang hăng hơmâo tơlơi phiăn lăp djơ̆ brơi kơ bruă khăm pơjrao. Yua anun, bruă prap lui kiăng ngă tui tong ten kiăng črăn tơlơi phiăn pơhlôm djơ̆ hloh, hơđong sui thun.